NJOFTIM- VENDIM NJËSUES I KOLEGJIT PENAL, DATË 27.03.2025

N J O F T I M – V E N D I M   N J Ë S U E S
Kolegji Penal i Gjykatës së Lartë të Republikës së Shqipërisë, në datën 03.03.2025, mori në shqyrtim, dhomë këshillimi, çështjen penale me nr. 61007-00051-00-2025, regjistri, me kërkues: Xh.K., I dyshuar: Për kryerjen e veprave penale "Ndihma për kalimin e paligjshëm të kufijve", kryer në bashkëpunim në formën e grupit të strukturuar kriminal, "Grupi i strukturuar kriminal", "Kryerje e veprave penale nga organizata kriminale dhe grupi i strukturuar kriminal", parashikuar nga nenet 298/2, 28.4, 333/a, 334/1 të Kodit Penal.
Me vendim të ndërmjetëm, Kolegji Penal i Gjykatës së Lartë, vendosi kalimin e çështjes në seancë gjyqësore, me një trupë të përbërë nga 5 gjyqtarë, duke shtruar për njësim çëshjen: 
1. A është e detyruar pjesëmarrja e prokurorit në gjykimin e verifikimit të nevojave të sigurimit, sipas nenit 246, pika 6, të Kodit të Procedurës Penale, në zbatim të masës së sigurimit personal të caktuar ndaj personit nën hetim.
Pas zhvillimit të seancës gjyqësore të datës 27.03.2025, Kolegji Penal i Gjykatës së Lartë, në lidhje me çështjen e shtruar për njësim, mban këtë qëndrim:
"Pjesëmarrja e prokurorit në gjykimin e verifikimit të nevojave të sigurimit, sipas nenit 246, pika 6, të Kodit të Procedurës Penale, në shqyrtimin në seancë gjyqësore në shkallën e parë është e detyrueshme. Mungesa e prokurorit gjatë shqyrtimit të ankimit në apel, kur është njoftuar dhe nuk ka paraqitur ndonjë shkak të arsyeshëm për mospjesëmarrjen, nuk e pengon gjykatën e apelit që të vijojë me shqyrtimin e ankimit ndaj vendimit që ka disponuar mbi verifikimin e nevojave të sigurimit dhe kërkesën për zëvendësimin apo revokimin e masës së sigurimit.”
Për këto arsye, Kolegji Penal i Gjykatës së Lartë, mbështetur në nenet 441, pika 1, shkronja “e” dhe 438 të Kodit të Procedurës Penale, vendosi: 
1. Lënien në fuqi të vendimit nr. 235 (87-2024-345), datë 25.11.2024 të Gjykatës së Posaçme të Apelit për korrupsionin dhe krimin e organizuar. 
2. Ky vendim është njësues dhe dërgohet për botim në Fletoren Zyrtare.