Gjykata e Lartë1. Jurisprudencë e përzgjedhur
Kolegji Administrativ i Gjykatës së Lartë
1. Kur Gjykata konstaton se bashkëndërgjyqësia e detyrueshme pasive është e paplotë, i cakton palës paditëse një afat gjyqësor deri në 20 ditë që t`a rregullojë atë. (Fjalë kyçe: Bashkëndërgjyqësi e detyrueshme pasive, rregullim i të metave të padisë, afat gjyqësor, afat procedural, ankand publik, procedurë privatizimi, shoqëri aksionare me kapital shtetëror, aksion, aksionar)
Në vendimin nr.00-2024-2888(285), datë 04.07.2024, për kundërshtimin e veprimeve administrative të privatizimit të shoqërisë me kapital të pjesshëm shtetëror, KAGJL vlerëson se gjykatat më të ulëta nuk kanë zbatuar drejt nenin 200 të Kodit të Procedurës Civile, ku veçanërisht gjykata e shkallës së parë, edhe pse ka konstatuar para mbylljes së hetimit gjyqësor se procedura e ankandit kishte përfunduar e një i tretë kishte blerë aksionet, nuk ka kryer asnjë veprim për t`a bërë të tretin pjesë të gjykimit. Gjykatat më të ulëta kanë shkelur rregullat procedurale të gjykimit mbi bashkëndërgjyqësinë e detyrueshme pasive, pasi nuk kanë bërë pjesë të gjykimit shoqërinë aksionare, për të cilën kishte nisur procedura e privatizimit përmes ankandit, duke mos u lënë paditësve afatin gjyqësor prej 20 ditësh për të rregulluar të metat e kërkesëpadisë. Këto të meta riparohen vetëm me kthimin e çështjes për rigjykim në shkallë të parë. Kur lindin mosmarrëveshje mbi vlerën nominale të aksioneve, interes të drejtpërdrejt për gjykimin kanë jo vetëm aksionarët që pretendojnë cenimin, por edhe shoqëria aksionare si mbajtëse e regjistrit të posaçëm të aksionarëve.
2. Vlera e dëmshpërblimit të pronës në rastet e shpronësimit “de facto”. (Fjalë kyçe: Dëmshpërblim prone, shpronësim “de facto”, shpërblim i drejtë, shpërblim proporcional, vlerë e tregut)
Në vendimin nr.00-2024-2906(301), datë 04.07.2024, për dëmshpërblimin e pronës me vlerën e tregut, për shkak të zhveshjes “de facto” nga e drejta e pronësisë (shpronësimit de facto), pasi mori në konsideratë praktikën gjyqësore të Gjykatës së Lartë, KAGJL çmon se shpërblimi i drejtë nuk është çmimi i vendosur nga organi publik me vendim të Këshillit të Ministrave, por është çmimi që i përgjigjet më mirë interesave të paditësit. Masa e shpërblimit duhet të jetë proporcionale dhe e kënaqshme, si dhe në përputhje me standardet ekonomike e sociale të paditësit.
3. Ligji i zbatueshëm në mosmarrëveshjet e lindura për lirimin nga detyra të punonjësve të PMNZH. (Fjalë kyçe: Marrëdhënie pune, ligj i posaçëm, akt i largimit nga puna, punonjës i PMNZH)
Në vendimin nr.00-2024-3022(313), datë 11.07.2024, KAGJL vlerëson se Gjykata Administrative e Apelit nuk ka mbajtur parasysh parashikimet e ligjit të posaçëm nr. 8766/2001 “Për mbrojtjen nga zjarri dhe shpëtimi”, të ndryshuar. Në mosmarrëveshjet gjyqësore për lirimin nga detyra të punonjësit të PMNZH, sipas ligjit të mësipërm, zbatohen dispozitat e Kodit të Punës, për sa kohë që ligji i posaçëm nuk parashikon ndonjë procedurë të posaçme për kundërshtimin e aktit të largimit në rrugë administrative apo gjyqësore.
4. Roli dhe përgjegjësitë e anëtarëve të njësisë së prokurimit, procedura e prokurimit me negocim pa shpallje paraprake të kontratës. (Fjalë kyçe: Procedurë prokurimi, procedurë me negocim pa shpallje paraprake të kontratës, urdhër prokurimi, anëtar i njësisë së prokurimit, përgjegjësi disiplinore)
Në vendimin nr.00-2024-3079(327), datë 16.07.2024, KAGJL vlerëson se njësia e prokurimit është një strukturë e specializuar, që ngrihet dhe funksionon brenda autoritetit kontraktor dhe ka si detyrë administrimin e vazhdueshëm të procedurave të prokurimit. Anëtarët e njësisë së prokurimit duhet të zotërojnë kualifikime të posaçme dhe të trajnohen në mënyrë të vazhdueshme. Nënshkrimi i urdhrit të prokurimit vetëm nga titullari i autoritetit kontraktor, nuk përjashton nga përgjegjësia anëtarin e njësisë së prokurimit, për sa kohë që ligji e ngarkon drejtpërdrejt njësinë e prokurimit me disa detyrime. Procedura e prokurimit me negocim pa shpallje paraprake të njoftimit të kontratës është një shmangie nga rregulli i përgjithshëm i prokurimeve publike, që kufizon të drejtën e konkurrencës dhe pikërisht për këtë shkak, autoriteti kontraktor duhet të jetë transparent, ndërkohë që nevoja për zhvillimin e saj duhet të jetë e domosdoshme, e arsyetuar dhe vetëm në rrethana të veçanta.
5. E drejta e pagës kur gjykata ka vendosur rikthimin në detyrë dhe koncepti i “gjësë së gjykuar të heshtur”. (Fjalë kyçe: Rikthim në detyrë, gjë e gjykuar e heshtur, vendim i formës së prerë, e drejtë page)
Në vendimin nr.00-2024-3473(341), datë 26.07.2024, KAGJL vlerëson se përfitimi i pagës për shkak të ekzistencës së një vendimi gjyqësor të formës së prerë që njeh të drejtën e rikthimit në detyrë, prezumohet se ekziston dhe përbën “gjë të gjykuar të heshtur”. E drejta e pagës nuk mund të mbrohet në mënyrë të pavarur në rrugë gjyqësore, për sa kohë që ekziston një vendim gjyqësor, që i ka garantuar të drejtën e rikthimit në detyrë paditëses.
6. Koncepti i TVSH së kreditueshme dhe kushtet për rimbursimin e saj, koncepti i kontratës së qirasë financiare (leasing). (Fjalë kyçe: TVSH e kreditueshme, rimbursim TVSH, qira financiare (leasing))
Në vendimin nr.00-2024-3498(272), datë 27.06.2024, KAGJL vlerëson se TVSH e kreditueshme është një koncept tatimor, që i lejon një biznesi të zbresë TVSH që ka paguar për blerjet dhe shërbimet e marra (inputet), nga TVSH që ka mbledhur nga shitjet dhe shërbimet e ofruara (outputet). Personi i tatueshëm kërkon rimbursimin e tepricës së kreditimit tatimor kur: i) personi i tatueshëm ka mbartur një shumë kreditimi tatimor për 3 muaj radhazi; ii) rimbursimi i kërkuar kalon shumën prej 400 000 lekësh. (…) Kontrata leasing është një marrëveshje financiare në të cilën një palë (qiradhënësi ose leasinguese) i jep një pale tjetër (qiramarrësi ose leasinguar), të drejtën për të përdorur një aktiv (si një automjet, pajisje, makineri ose pasuri të paluajtshme), për një periudhë të caktuar kohore, në këmbim të pagesave periodike. Kjo lloj kontrate është një formë e financimit që i lejon qiramarrësit të përdorë aktivin, pa pasur nevojë të bëjë një blerje të plotë të tij. (…) Kur mallrat transferohen në bazë të një kontrate, që parashikon marrjen me qira ose shitjen me këste, pavarësisht nga momenti i kalimit të pronësisë, detyrimi për TVSH lind mbi vlerën e plotë të mallit. Qiradhënësi financiar është ndërmjetës financiar që transferon si pronën e blerë nga një furnizues, ashtu dhe TVSH e plotë të papaguar paraprakisht prej tij në favor të furnizuesit, tek qiramarrësi, por jo në mënyrë të menjëhershme, por me këste mujore të qirasë financiare. Duke qenë se blerja dhe shitja e objektit/sendit qiradhënës nga ana e qiradhënësit nuk kryhet në të njëjtën kohë, pikërisht kjo diferencë kohe ka krijuar edhe TVSH e kredituar dhe që kërkohet të rimbursohet.
7. Gjykata kompetente për shqyrtimin e pavlefshmërisë së titullit ekzekutiv. (Fjalë kyçe: Titull ekzekutiv, pavlefshmëri e titullit ekzekutiv, kompetencë lëndore, gjykatë administrative)
Në vendimin nr.00-2024-2496, datë 12.06.2024, KAGJL vlerëson se kriter për ndarjen e kompetencës lëndore gjatë fazës së ekzekutimit të detyrueshëm është natyra juridike e marrëdhënies që ka gjeneruar titullin ekzekutiv. Edhe pse titulli ekzekutiv është një vendim i gjykatës civile të vitit 1995, për të cilin kërkohet pavlefshmëria për shkak të parashkrimit, objekti i titullit është kompensimi për burgim të padrejtë, mosmarrëveshje kjo në lëndë administrative, për gjykimin e të cilës kompetente nga ana lëndore është gjykata administrative.
8. Gjykata kompetente për zgjidhjen e mosmarrëveshjeve të punës. (Fjalë kyçe: Marrëdhënie pune, mosmarrëveshje pune, shofer, punonjës administrativ, kompetencë lëndore, gjykatë administrative)
Në vendimin nr.00-2024-2648, datë 20.06.2024, KAGJL vlerëson se mosmarrëveshjet e punës së punonjësve administrativë, siç është shoferi i drejtorisë rajonale të spitalit, janë të natyrës civile dhe kompetente për shqyrtimin e tyre është gjykata civile.
9. Njohja dhe vlefshmëria e diplomave të arsimit të lartë. (Fjalë kyçe: Arsim i lartë, diplomë, program studimi, cikël studimi, njohje diplome, diplomë e pavlefshme, vit akademik)
Në vendimin nr.00-2024-2377(233), datë 04.06.2024, KAGJL vlerëson se diploma është dokumenti zyrtar që i jepet dikujt si dëshmi, kur mbaron një shkollë të lartë a të mesme profesionale ose një kurs të posaçëm dhe lëshohet mbi bazën e përmbajtjes së programit studimor. Me ligjin nr. 8461/1999, kohëzgjatja e plotë e studimeve në shkollat e larta universitare ishte 4 vite akademike me 8 semestra dhe diplomat që lëshoheshin ishin të integruara të nivelit të dytë. Ndërkohë, me ligjin nr. 9741/2007, programet e studimit ndahen me tre cikle, ku cikli i parë i studimit zgjat 3 vite akademike me 6 semestra. Për sa kohë që paditësja i ka nisur studimet sipas ligjit nr. 8461/1999, duke zhvilluar 4 vite akademike të plota me 8 semestra, ajo duhet të pajisej me diplomë të integruar të nivelit të dytë nga institucioni i arsimit të lartë.
10. Mosmarrëveshjet e lindura për vlerësimin financiar të pronës, e drejta e parablerjes. (Fjalë kyçe: E drejta e parablerjes, vlerësim financiar i pronës, hetim i plotë dhe i gjithanshëm)
Në vendimin nr.00-2024-2517(234), datë 05.06.2024, KAGJL vlerëson se e drejta e parablerjes nuk shuhet, kur pasuria transferohet në pronësi apo në administrim të një institucioni tjetër shtetëror. Kur Gjykata Administrative e Apelit vihet përballë pretendimeve për kundërshtimin e vlerësimit financiar të pronës së kryer nga Agjencia e Trajtimit të Pronave, ajo duhet t`a shtrijë hetimin gjyqësor jo vetëm ndaj vlerësimin financiar të pronës, por duhet të saktësojë gjithashtu të drejtën e parablerjes së ish-pronarit, si dhe të vlerësojë nëse ai ka hequr dorë ose jo prej saj.
11. Lirimi apo dalja në rezervë e ushtarakëve të forcave të armatosura për shkak të viteve të plota të shërbimit në gradë, mosha e pensionit të ushtarakëve. (Fjalë kyçe: Ushtarak, Forca të Armatosura, dalje në rezervë, lirim, vite të plota shërbimi në gradë, koha e qëndrimit në shërbim, nënkolonel, moshë pensioni e ushtarakut)
Në vendimin nr.00-2024-2468(241), datë 06.06.2024, KAGJL vlerëson se, për ushtarakët aktivë që mbajnë gradën e nënkolonelit dhe kanë mbushur mbi 27 vite të plota shërbimi në këtë gradë, organi publik kompetent mund të procedojë me lirimin apo daljen e tyre në rezervë, për sa kohë që nuk kanë përparuar në gradën e radhës. Mosha e pensionit për ushtarakët e Forcave të Armatosura është 70 vjeç.
12. Mosmarrëveshjet e punës së punonjësve të Shërbimit Informativ të Shtetit, si dhe afati për ngritjen e padisë. (Fjalë kyçe: Punonjës i SHISH, afat parashkrimi, ligj i posaçëm, akt administrativ i pavlefshëm)
Në vendimin nr.00-2024-3106(321), datë 16.07.2024, KAGJL çmon se për mosmarrëveshjet që lindin nga marrëdhëniet e punës së punonjësve të Shërbimit Informativ Shtetëror, gjen zbatim ligji i posaçëm nr. 9357/2005, si dhe Kodi i Punës, i ndryshuar, për aspektet e parregulluara prej ligjit të posaçëm. Në rastin e punonjësve të SHISH, akti i lirimit/përjashtimit është një akt administrativ dhe shqyrtimi i tij gjyqësisht duhet të bëhet në harmoni me vendimin njësues civil nr.31/2003 të Kolegjeve të Bashkuara të Gjykatës së Lartë. Pavarësisht faktit se akti i lirimit të paditësit është akt administrativ dhe pretendimi për pavlefshmëri absolute mund të ngrihet në çdo kohë, rregullimi i pasojave duhet të kërkohet prej paditësit brenda afatit 3-vjeçar të parashkrimit të përcaktuar në nenin 203 të Kodit të Punës, të ndryshuar.
13. Ligjshmëria e aktit administrativ (Kundërvajtje administrative – gjobë) në fushën e sigurisë ushqimore. (Fjalë kyçe: Akt administrativ, gjobë, kundërvajtje administrative, veprimtari e palicencuar, siguri ushqimore)
Në vendimin nr.00-2024-3160(314), datë 11.07.2024, KAGJL vlerëson se kundërvajtjet administrative (gjobat) të/e vendosura nga autoriteti që kontrollon sigurinë ushqimore në treg janë të ligjshme, kur konstatohet se shoqëria tregtare kryen veprimtari ekonomike e palicencuar apo kur shoqëria kryen veprimtari ndërkohë që i është revokuar licenca për shkak të ndryshimit të drejtuesit teknik, të cilit i mungonte trajnimi i HACCAP.
14. Gjykata kompetente për ndryshimin e përmbajtes së dëshmisë së trashëgimisë, veprimtaria e noterit si organ publik. (Fjalë kyçe: Gjykatë kompetente, kompetencë lëndore, pavlefshmëri e dëshmisë së trashëgimisë, ndryshim i dëshmisë së trashëgimisë, kundërshtim i aktit noterial, noter, organ publik)
Në vendimin nr.00-2024-3632, datë 19.09.2024, KAGJL vlerëson se noteri publik ushtron një funksion të pavarur, me karakter publik, në shërbim të personave fizikë dhe juridikë, që rregullohet sipas ligjit të posaçëm nr.110/2018 “Për noterinë”. Në zbatim të pikës 4, të nenit 97, të ligjit nr.110/2018, kur pala kërkon gjyqësisht ndryshimin e përmbajtjes së dëshmisë së trashëgimisë, mosmarrëveshja ka natyrë administrative dhe duhet të gjykohet nga gjykata administrative.
Kolegji Penal i Gjykatës së Lartë
1. Elementet e figurës së krimit “Vjedhja e energjisë elektrike ose impulseve telefonike”, kur nuk përmbushet detyrimi kontraktor. (Fjalë kyçe: Vjedhje e energjisë elektrike, përfitim i paligjshëm, cilësim ligjor i veprës, prezumim i pafajësisë, mospërmbushje detyrimi kontraktor, marrëdhënie juridiko-civile kontraktuale, kontratë furnizimi me energji elektrike).
Në vendimin nr.00-2024-1050(138), datë 06.06.2024, KPGJL arsyeton se në rastet e detyrimeve kontraktore të lindura si pasojë e kontratave tip të furnizimit me energji elektrike, vlerësohet se është detyrim që derivon nga kontrata e palës furnizuese që para se të procedojë me ndërprerjen e energjisë elektrike për abonentët debitor, t'i njoftojë ata paraprakisht, duke u dhënë mundësi për shlyerjen e detyrimit brenda një afati kohor të caktuar sipas kushteve të kontratës. Në eventualitetin e mosrespektimit nga ana e palës debitore të detyrimit kontraktor, palës furnizuese, i lind e drejta për të kërkuar zgjidhjen e njëanshme të kontratës. Vetëm pas vërtetimit të faktit juridik, të mosshlyerjes së detyrimit nga pala debitore brenda afatit kohor të caktuar nga dita e ndërprerjes së saj, do të passillte situatën juridike kur marrëdhënia e detyrimit shuhet, dhe për pasojë çfarëdo veprim i kryer nga ana e palës debitore në njërën apo disa nga format e anës objektive të veprës penale “Vjedhja e energjisë elektrike ose impulseve telefonike”, do të formonte elementet e kësaj figure krimi. Ky përfundim është rrjedhojë logjike e parashikimit kushtetues se askujt nuk mund t’i privohet liria për shkak të mospërmbushjes së një detyrimi kontraktor.
2. Gjykata kompetente për parashkrimin e ekzekutimit të vendimit kur ky i fundit nuk është vënë në ekzekutim. (Fjalë kyçe: Ekzekutim vendimi, gjykatë kompetente, parashkrim ekzekutim vendimi, mosekzekutim vendimi)
Në vendimin nr.00-2024-1118, datë 11.06.2024, KPGJL thekson se gjykata kompetente për parashkrimin e ekzekutimit të vendimit kur ky i fundit nuk është vënë në ekzekutim, do të jetë gjykata e shkallës së parë që ka dhënë vendimin, pasi praktika e ekzekutimit të vendimit, për shkak të mosekzekutimit asnjëherë të tij, disponohet pikërisht nga prokuroria që ligji i ka ngarkuar detyrimin për të ndërmarrë masat e nevojshme për ekzekutimin e tij.
3. Roli i ekspertit dhe kërkesat ligjore që duhen përmbushur në caktimin e tij.(Fjalë kyçe: Akt ekspertimi, caktim eksperti, njohuri të posaçme, kërkesa ligjore në caktimin e ekspertit)
Në vendimin nr.00-2024-1151(148), datë 27.06.2024, KPGJL vendosi se kërkesa ligjore në caktimin e ekspertit është pajisja më njohuri të posaçme për kryerjen e ekspertimit. Organi procedues ka detyrimin që të caktojë ekspertë jashtë listës në librat e caktuar për këtë qëllim vetëm në raste të veçanta, kur ekspertimi nuk mund të kryhet nga lista e ekspertëve të regjistruar pranë gjykatës. Eksperti nuk është organ i ndjekjes penale që të nxjerrë përfundime lidhur me mekanizmin e ngjarjes, por e ndihmon këtë të fundit me përfundimet e tij shkencore të cilat, të marra e të analizuara në tërësi me provat e tjera, e çojnë organin procedues në përfundimet përkatëse për rastin objekt shqyrtimi. Akti i ekspertimit është një provë shkencore që e merr vlerën dhe fuqinë provuese vetëm pasi gjykatat e çmojnë atë.
4. Gjykata kompetente për shqyrtimin e masës mjekësore. (Fjalë kyçe: Gjykatë kompetente, masë mjekësore)
Në vendimin nr.00-2024-1161, datë 27.06.2024, KPGJL thekson se shqyrtimi masave mjekësore që jepen nga gjykata ndaj personave të papërgjegjshëm që kanë kryer një vepër penale, duke qenë në thelb një vendim i revokueshëm, do të shqyrtohet në vijimësi nga gjykata që i ka caktuar. Masat e trajtimit të detyrueshëm nuk janë dënime penale, por janë masa të posaçme sui generis të karakterit mjekësor, të cilat mund t’iu caktohen vetëm personave me çrregullime të shëndetit mendor që kryejnë vepra penale.
5. Caktimi i kujdestarit ose thirrja e trashëgimtarëve në rast se i pandehuri ka vdekur para paraqitjes së kërkesës për rishikim. (Fjalë kyçe: Kërkesë për rishikim, ndërrim jete i të pandehurit, kujdestar, trashëgimtarë)
Në vendimin nr.00-2024-1215(161), datë 02.07.2024, KPGJL vlerëson se provat e shqyrtuara dhe të administruara në gjykimin e mëparshëm vazhdojnë të mbeten të vlefshme, por palët mund të kërkojnë rivlerësimin e vërtetësisë dhe fuqisë së tyre provuese, në raport me provat e reja të zbuluara rishtazi. Në këtë kuptim, gjykata e caktuar për rigjykimin e çështjes nuk është e detyruar të përsërisë hetimin dhe debatin gjyqësor për provat e marra gjatë gjykimit të mëparshëm. Kjo për arsye se thelbi i rigjykimit të çështjes lidhet me vlerësimin dhe fuqinë provuese të provës së re, në drejtim të konfirmimit të vendimit të parë që rishikohet ose në një vendimmarrje të ndryshme. Gjykata e apelit, e caktuar për rigjykimin e çështjes, në momentin që ka konstatuar se një nga palët kishte ndërruar jetë (para paraqitjes së kërkesës për rishikim nga i bashkëpandehuri) duhet të vlerësonte faktin nëse ndodhej para rastit për caktimin e kujdestarit apo të thërriste trashëgimtarë ose të afërm të tij, i cili do të ushtronte të drejtat që në procesin e rishikimit do t’i takonin të gjykuarit.
6. Gjyqtari i seancës paraprake nuk bën vlerësime thelbësore që i takojnë fazës së gjykimit. (Fjalë kyçe: Gjyqtar i seancës paraprake, hetim, urdhërim ngritje akuze, prova të reja)
Në vendimin nr.00-2024-1181(160), datë 02.07.2024, KPGJL thekson se kontrolli i ushtruar nga gjyqtari i seancës paraprake mbi hetimet e kryera, përfshi këtu edhe urdhërimin e ngritjes së akuzës, si rezultat i ndryshëm i kërkesës së prokurorit për pushimin e çështjes, nuk do të thotë se ai merr funksionet e prokurorit në ushtrimin e ndjekjes penale. Detyra e gjyqtarit të seancës paraprake është që në prani të burimit të provave që i paraqiten, të verifikojë nëse në situatën në të cilën ndodhen aktet, mund të kalohet a të pushohet çështja dhe nëse ka nevojë në plotësimin e hetimeve, duke urdhëruar veprime konkrete të ndryshme nga ato që janë kryer deri më tani apo plotësimin e atyre që janë paraqitur përpara gjyqtarit të seancës paraprake, pa bërë vlerësime thelbësore që i takojnë fazës së gjykimit (nuk mund të bëjë një analizë të thelluar duke argumentuar nëse niveli i të provuarit shkon përtej dyshimit të arsyeshëm).
7. Viktima nuk legjitimohet të bëjë ankim ndaj vendimit të gjykatës që ka zgjidhur çështjen në themel. (Fjalë kyçe: Viktima, moslegjitimim, ankim, rekurs).
Në vendimin nr.00-2024-1244(174), datë 09.07.2024, KPGJL çmon të sjellë në vëmendje se kur një individ ngre një pretendim se ai ka vuajtur trajtime nga agjentët e policisë apo agjentët e tjerë të ngjashëm të shtetit, duhet t`i sigurohen të drejtat dhe liritë e përcaktuara në KEDNJ, duke nënkuptuar se duhet të ketë edhe një hetim zyrtar efektiv që në përfundim të tij, të çojë në identifikimin dhe më pas ndëshkimin e atyre që janë përgjegjës. Në vlerësimin e provave, qofshin ato direkte apo indirekte, gjyqtari ka detyrimin për të konstatuar përshtatshmërinë e tyre në lidhje me përgjegjshmërinë e të pandehurit apo pafajësinë e tij dhe më tej, duke dhënë argumente për bindjen e arritur mbi to. Kodi i Procedurës Penale nuk parashikon të drejtën e viktimës për të ushtruar ankim ndaj vendimit të gjykatës (që ka zgjidhur çështjen në themel). Të drejtën për të apeluar vendimet e gjykatës së shkallës së parë e kanë vetëm prokurori, i pandehuri, paditësi apo i padituri civil. Rregullat e përgjithshme të ankimit gjejnë zbatim edhe në rastin e rekursit, si një nga mjetet e zakonshme të ankimit.
8. Kompetenca funksionale për gjykimin e çështjeve me viktimë të mitur. (Fjalë kyçe: Kompetenca funksionale, viktimë, i mitur, gjyqtar seksioni për të mitur)
Në vendimin nr.00-2024-1267, datë 09.07.2024, KPGJL vlerëson se përsa kohë Kodi i Procedurës Penale dhe Kodi i Drejtësisë Penale për të Mitur nuk kanë bërë diferencim lidhur me kompetencën funksionale për gjykimin e çështjeve me viktimë të mitur, sipas fazës në të cilin ndodhet procedimi penal (hetime paraprake/seancë paraprake/themel), këto çështje edhe në fazën e hetimeve paraprake duhet të shqyrtohen nga gjyqtari i seksionit për të miturit.
9. Zbatimi i rregullave të njoftimit të të pandehurit dhe vendimit të arsyetuar të gjykatës. (Fjalë kyçe: Njoftim i të pandehurit, njoftim i mbrojtësit, realizimi i njoftimit, proces i rregullt ligjor, njoftim i vendimit të arsyetuar).
Në vendimin nr.00-2024-1248(172), datë 09.07.2024, KPGJL arsyeton se, urdhërimi për thirrjen dhe njoftimin e të pandehurit, si dhe mbrojtësit të tij për të marrë pjesë në gjykimin në apel është një detyrim ligjor për gjykatën. Realizimi i njoftimit duhet bërë në përputhje me kërkesat ligjore të parashikuara nga neni 140 të Kodit të Procedurës Penale, sipas rendit zbritës të parashikuar në këtë dispozitë, duke shteruar të gjitha fazat e parashikuara në këtë nen. Mosrespektimi i kësaj dispozite passjell cenimin e të drejtës së mbrojtjes dhe të drejtës për një proces të rregullt ligjor. Nuk është i mjaftueshem për efekt njoftimi thjesht administrimi në dosje i aktit “Njoftim me shpallje” i mbajtur nga gjykata pa u konfirmuar afishimi i tij në të gjitha vendet sipas nenit 140/5 të këtij Kodi. Detyrimi për të njoftuar vendimin e arsyetuar palëve në proces i takon vetëm gjykatës, e cila duhet t`a dokumentojë këtë moment të rëndësishëm procedural.
10. Verifikimi i rrethanave për përcaktimin e dashjes direkte nga pakujdesia. (Fjalë kyçe: Vrasje në rrethana të tjera cilësuese, dashje e tërthortë, pakujdesi, pasojë).
Në vendimin nr.00-2024-1247(173), datë 09.07.2024, KPGJL thekson se, pavarësisht elementeve të përbashkët të dy figurave të veprave penale “Vrasja në rrethana të tjera cilësuese” me atë “Vrasja me dashje” ndryshimi mes tyre qëndron në faktin se, nëse në “vrasjen me dashje”, autori i veprës penale synon drejtpërdrejt jetën e viktimës pa rrezikuar jetën e ndonjë personi tjetër, në vrasjen me dashje të parashikuar nga neni 79/ë i po këtij Kodi, autori i vrasjes me dashje, megjithëse nuk synon drejtpërdrejt jetën e personave të tjerë të pranishëm në mjedisin ku kryhet vepra, nuk merr asnjë masë parandaluese dhe e kryen vrasjen duke rrezikuar edhe jetën e shumë personave të tjerë. Për të arritur në përfundimin, nëse vepra penale është kryer me dashje të tërthortë apo nga pakujdesia, gjykata duhet të verifikojë, mes të tjerash, sidomos këto rrethana (jo shteruese): cili ka qenë qëllimi kryesor i autorit të veprës penale; a ka patur ndonjë interes të posaçëm autori që të shkaktohet pasoja; a ka patur në plan autori që vetë ai të ndërmarrë ndonjë veprim me qëllim që t`a parandalojë shkaktimin e pasojës; a ka llogaritur autori se personat që gjenden në vendin e ngjarjes do të ndërmarrin veprime (masa) që të mos shkaktohet pasoja e dëmshme etj.
11. Gjykimi i shkurtuar. (Fjalë kyçe: Gjykim i shkurtuar, ligji penal favorizues, burgim i përjetshëm).
Në vendimin nr.00-2024-1242(176), datë 09.07.2024, KPGJL vlerëson nëse gjykatat më të ulëta ndodhen mes zbatimit të parimit “tempus regit actum” dhe zbatimit të ligjit penal favorizues (në rastin e paraqitjes së kërkesës për gjykim të shkurtuar nga i pandehuri i akuzuar me burgim të përjetshëm gjatë hyrjes në fuqi të ndryshimeve të KPP) duhet t’i jepet përparësi të drejtave dhe garancive kushtetuese të të pandehurit. Nëse dispozita procedurale ka një ndikim në ashpërsinë e masës së dënimit që duhet të jepet nga gjykata, atëherë ajo është një dispozitë penale materiale, ku ka vend për t’u zbatuar parimi i sanksionuar në nenin 29, pika 2 të Kushtetutës, si dhe neni 3, pika 3 i Kodit Penal.
12. Kundërshtimi i dëshmisë së bërë në gjykim me deklarimet e dhëna në hetim. (Fjalë kyçe: Kundërshtimi i dëshmisë, deklarim, dëshmi e rremë, provë e re, prova të tjera).
Në vendimin nr.00-2024-1245(175), datë 09.07.2024, KPGJL thekson se deklarimet e dhëna nga dëshmitari në fazën e hetimit paraprak, megjithëse nuk përbëjnë provë në vetvete, mund të vlerësohen si provë, nëse lidhen me prova të tjera që konfirmojnë vërtetësinë e tyre.
Kolegji Civil i Gjykatës së Lartë
Vendim njësues
1. Zbatimi i nenit 61 të Kodit të Procedurës Civile në çështjet pa palë kundërshtare. (Fjalë kyçe: Moskompetenca/kompetenca tokësore ekskluzive, tjetërsim i pasurisë së të miturit, administrim i pasurisë së të miturit, gjykim pa palë kundërshtare, gjykim gracioz)
Në vendimin njësues nr.00-2024-3759(90), datë 29.02.2024, KCGJL çmon se kompetenca tokësore e gjykatës që shqyrton kërkesën me objekt lëshimin e autorizimit të tjetërsimit të pasurive të të miturit (neni 234 i Kodit të Familjes), nuk përfshihet në kategorinë e kompetencës tokësore ekskluzive dhe për rrjedhojë mungesa e saj nuk mund të merret parasysh nga gjykata kryesisht, pavarësisht natyrës së gjykimit gracioz. KCGJL çmon se parashikimi i paragrafit të dytë të nenit 61 të Kodi i Procedurës Civile, nuk mund dhe nuk duhet të merret në konsideratë vetëm për çështjet me palë kundërshtare, ku palës së paditur i është dhënë mundësia për të kundërshtuar kompetencën tokësore brenda një afati të arsyeshëm. Konstatimi kryesisht nga gjykata i mungesës së kompetencës tokësore nuk do t’i shërbente interesit të asnjë subjekti, pasi nuk do të vihej në diskutim asnjëherë çështja e kompetencës tokësore të gjykatës, përpara të cilës është paraqitur kërkesa që e ka vënë në lëvizje. Për këtë arsye KCGJL arrin në konkluzionin njësues se neni 61 i Kodi i Procedurës Civile është i zbatueshëm edhe në çështjet pa palë kundërshtare (me karakter gracioz).
2. Ekzistenca e kushteve dhe kritereve të kundërpadisë. (Fjalë kyçe: Kundërpadi, legjitimimi pasiv procedural, Avokatura e Shtetit, lidhja e objektit të padisë me atë të kundërpadisë, objekt i kundërpadisë)
Në vendimin nr.00-2024-1060(115), datë 13.03.2024, KCGJL çmon se padia ose kundërpadia ngrihen ndaj subjektit që ka pretendime pronësie mbi të njëjtën pasuri të pretenduar edhe nga paditësi, ndaj palës që me veprimet e tij cenon të drejtën e paditësave. Avokatura e Shtetit në rastin në gjykim nuk gëzon cilësinë e subjektit mbajtës së të drejtës së pronësisë, por ka cilësinë e subjektit përfaqësues që vepron në llogari të institucioneve shtetërore. Për rrjedhojë, ajo nuk mund të ketë cilësinë e subjektit të paditur në process, pasi nuk pretendon pasurinë objekt gjykimi në emër të saj dhe as rezulton të ketë dhënë vendimin objekt kundërshtimi. Kundërpadia, kur gjykohet së bashku në një gjykim të vetëm me padinë, kushtëzohet nga ekzistenca e kushteve të nenit 160 të Kodi i Procedurës Civile. Nuk plotësohet kushti i parashikuar në nenin 160/1 i Kodi i Procedurës Civile, që padia dhe kundërpadia të gjykohej në një çështje, kjo për faktin se si objekti i padisë ashtu edhe objekti i kundërpadisë, në themel të tyre janë të njëjtë dhe nuk jemi para kushtit kur këto dy objekte kanë lidhje me njëri-tjetrin.
3. Refuzimi i njohjes dhe dhënies së fuqisë ligjore nga gjykata shqiptare e akteve ligjore të huaja lidhur me martesën. (Fjalë kyçe: Zgjidhje martese, akt noterial i huaj, njohje vendimi, autoritet gjyqësor)
Në vendimin nr.00-2024-1198(153), datë 27.03.2024 KCGJL vlerëson se vendimi që kërkohet të njihet, nuk është vendim i dhënë nga një autoritet gjyqësor, por pretendohet të jetë bazuar në nenin 1 të Konventës "Mbi njohjen e divorceve dhe ndarjeve ligjore", pjesë e sistemit të brendshëm me ligjin nr. 109/2012. Martesa nuk konsiderohet si një kontratë ligjore, por si një institut bazë i krijimit të familjes dhe për rrjedhojë zgjidhja e saj sipas parimeve të legjislacionit shqiptar është e papranueshme që të realizohet nga noteri. Realizimi i procedurave gjyqësore për zgjidhjen e martesës në zbatim të dispozitave ligjore dhe neneve të tjera përkatëse të Kodi i Procedurës Civile, përbën një shfaqje të mbrojtjes ligjore që shteti shqiptar i ka kushtuar martesës, duke ia caktuar këtë detyrë gjykatave. Prandaj, akti i huaj për zgjidhjen e martesës i realizuar me marrëveshjen e palëve te noteri publik, konsiderohet në kundërshtim me këto parime, gjë që përbën një shkak ndalues për njohjen e tij.
4. Procedura e ankandit në kuadër të ekzekutimit të detyrueshëm mbi sendet e paluajtshme. (Fjalë kyçe: Barrë hipotekore/barrë siguruese, përmbushje detyrimi monetar, procedurë ankandi, veprime përmbarimore, kreditor, vlera e kredisë)
Në vendimin nr.00-2024-1776(190), datë 17.04.2024, KCGJL vlerëson se neni 577 i Kodi i Procedurës Civile nuk sqaron qartë se në cilin moment merret vendimi nga përmbaruesi për kalimin e sendit në pronësi të kreditorit, kur çmimi i sendit në ankandin e dytë është më i madh se vlera e kredisë së kreditorit. Për të identifikuar këtë fazë, neni 577 i Kodi i Procedurës Civile duhet interpretuar në mënyrë sistematike në raport me nenet 573 dhe 579, ku momenti i kalimit të pronësisë së sendit që fitohet nëpërmjet ankandit, është ai kur paguhet i plotë çmimi i sendit sipas vlerës së ankandit. I njëjti rregull vlen edhe për kalimin e pronësisë mbi sendin objekt ekzekutimi tek kreditori, që e pranon atë kundrejt kredisë, kur çmimi është më i lartë se vlera e ankandit. Pronësia do të kalojë në favor të këtij kreditori, vetëm pasi të paguhet diferenca midis çmimit të sendit në ankand dhe vlerës së kredisë, pasi në këto raste del e nevojshme të “balancohet” në mënyrë përfundimtare çmimi i ankandit me vlerën e kredisë. Kur çmimi i sendit në ankandin e fundit është më i lartë se vlera e kredisë, kreditori nuk e fiton pronësisë vetëm me cilësinë e kreditorit kundrejt kredisë, por edhe me cilësinë e kreditorit blerës për pjesën e çmimit të sendit që tejkalon vlerën e kredisë.
5. Shuarja e detyrimeve që burojnë nga titulli ekzekutiv për shkak të kompensimit të detyrimeve ekzistuese reciproke. (Fjalë kyçe: Kompensim, përmbushje detyrimi,detyrime reciproke)
Në vendimin nr.00-2024-2017, datë 15.05.2024, KCGJLkonkludon se për sa kohë pala paditëse ka pranuar ekzistencën e detyrimit monetar, nuk e ka kundërshtuar atë dhe ka pranuar të kryejë pagesën e tij në mënyrë vullnetare, nuk mundet të pretendojë kompensimin e tij me detyrimin reciprok të subjektit tjetër. Në një situatë të tillë, ka rënë kushti kryesor i institutit të kompensimit, që është ekzistenca e njëkohshme e detyrimeve reciproke dhe të kërkueshme. Në momentin që njëra nga palët ka përmbushur detyrimin, ky i fundit nuk përfaqëson më një detyrim të kërkueshëm, të aftë për të realizuar një procedurë kompensimi. Kolegji çmon se ky kërkim i padisë nuk mund të qëndrojë si i tillë, për sa kohë nuk gjen mbështetje ligjore.
6. Pretendimet për pronësitë në proces legalizimi për aplikime nga dy ose më shumë subjekte anëtarë të një familje. (Fjalë kyçe: Proces legalizimi, anëtarë familje, vetëdeklarimi, kontratë privatizimi)
Në vendimin nr. 00-2024-2313(337), datë 30.05.2024, KCGJL vlerëson se ndryshimet e fundit ligjore kanë parashikuar mënyrën e zgjidhjes së mosmarrëveshjeve midis anëtarëve të një familje apo midis personave që kanë pretendime në lidhje me objektin në proces legalizimi, në raport me kohën e depozitimit të vetëdeklarimit. Kur gjatë procedurave të legalizimit konstatohet se për të njëjtin ndërtim pa leje ka aplikime nga dy ose më shumë subjekte, procedurat e legalizimit vijojnë në favor të subjektit që ka aplikuar i pari në kohë. Ky parashikim i ligjit nuk i pengon personat e tjerë që kanë pretendime për pjesët e tyre përkatëse të kërkojnë përpara gjykatës kompetente njohjen e të drejtave dhe pjesëve takuese që ata pretendojnë.
7. Vlerësimi i natyrës juridike të mosmarrëveshjes për identifikimin e duhur të shkakut të kërkimit të padisë. (Fjalë kyçe: Padi rivendikimi, titull pronësie, pushim cenimi)
Në vendimin nr.00-2024-2588(357), datë 11.06.2024, KCGJL thekson se shkaku ligjor mbi të cilin bazohen padia e rivendikimit dhe ajo e pushimit të cenimit të sendit, i diferencon këto mjete juridike të mbrojtjes së pronësisë nga njëri-tjetri. Për pasojë, këto nuk mund të qëndrojnë apo të materializohen si pjesë e kërkimeve të së njëjtës padi. Në vlerësim të natyrës juridike të mosmarrëveshjes objekt gjykimi dhe identifikimit të saktë të shkakut të lindjes së saj, në mbështetje të neneve 465, 486 e 493, të Kodi i Procedurës Civile duhet të identifikohet në mënyrën e duhur jo vetëm shkaku i kërkimit të padisë, por edhe ekzistenca dhe vlefshmëria e të drejtave dhe e titujve respektivë të pronësisë, sipas të cilës do të orientohet edhe zgjidhja e mosmarrëveshjes mbi pretendimet e palëve.
8. Kompetenca tokësore e gjykatës që shqyrton kërkesat/paditë në fazën e ekzekutimit të detyrueshëm. (Fjalë kyçe: Kompetenca tokësore, ekzekutim i detyrueshëm, marrëveshje kompetence, kompetencë tokësore ekskluzive)
Në vendimin nr.00-2024–2686, datë 24.06.2024, ku palët me marrëveshje kanë përcaktuar gjykatën kompetente që do të shqyrtojë mosmarrëveshjet që rrjedhin nga kontrata e kredisë, KCGJL çmon se kompetenca tokësore e gjykatës që shqyrton kërkesat apo paditë në fazën e ekzekutimit të detyrueshëm nuk ka karakter ekskluziv, që të legjitimojë gjykatën të vlerësojë kryesisht nëse është apo jo kompetente nga pikëpamja tokësore, për sa kohë asnjë nga palët në gjykim nuk e ka pretenduar apo prapësuar në gjykim.
9. Pezullimi i gjykimit kërkon paraprakisht nga gjykata analizën e kompetencës lëndore. (Fjalë kyçe: Kompetencë lëndore, kërkesë për pezullim)
Në vendimin nr.00-2024-3009(385), datë 26.06.2024, KCGJL shprehet se, në kushtet kur kërkohet pezullimi i gjykimit, gjykata detyrimisht duhet të diskutojë paraprakisht kompetencën e saj lëndore për gjykimin e çështjes. Kjo radhë disponimi jo vetëm shmang zvarritjen e paarsyeshme të procesit, por krijon mundësi që pas rënies së shkakut të pezullimit gjykimi të vijojë menjëherë nga gjykata kompetente në fazën e mbetur.
10. Vlefshmëria e kontratave të privatizimit dhe bazueshmëria e padisë së fitimit të pronësisë me parashkrim fitues, në objektet ish-pronë private me shpenzime të kryera nga shteti apo pronari. (Fjalë kyçe: Privatizim, objekt ish-pronë private, parashkrim fitues, shpenzime shtetërore, bashkëpronësi)
Në vendimin nr. 00-2024-2723(386), datë 26.06.2024, për vlefshmërinë e kontratave të privatizimit dhe bazueshmërisë e padisë së fitimit të pronësisë me parashkrim fitues, KCGJL konkludon se një nga cilësitë që duhet të ketë titulli, me qëllim që të gjenerojë fitimin e pronësisë nëpërmjet parashkrimit fitues, është që të mos jetë i ndaluar me ligj. Gjykata e Lartë me vendimin njësues nr. 393, datë 26.10.2022 ka arritur në konkluzionin lidhur me veprimin juridik që ka për qëllim kalimin e pronësisë me privatizimin e një banese shtetërore, me kushtin që ajo të mos ketë qenë ish-pronë private. Kur në objektin ish-pronë private janë kryer shpenzime nga shteti apo pronari të cilat kapërcejnë masën mbi 50% të vlerës së objektit, objekti mbetet në bashkëpronësi, për rrjedhojë paditësit e kundërpaditur dhe e paditura kundërpaditëse kanë fituar të drejtën e bashkëpronësisë mbi pjesën e sendit të paluajtshëm.
11. Lirimi dhe dorëzimi i truallit pronë private dhënë me qira subjekteve private nga shteti. (Fjalë kyçe: Dorëzim trualli, kontratë qiraje, cenim i të drejtës së pronës)
Në vendimin nr.00-2024-3353(407), datë 02.07.2024, KCGJL vlerësoi se, duke pasur parasysh se paditësi ka rreth 20 vite në kërkim të mbrojtjes së të drejtës të pronësisë, kjo e drejtë do të realizohej më shpejt me zbatimin e nenit 485(1)(dh) të Kodi i Procedurës Civile dhe disponimin për ndryshimin e vendimit dhe pranimin e padisë, duke detyruar palët e paditura solidarisht të dorëzojnë truallin. Kolegji detyron solidarisht të paditurit, por në fakt detyrimi kryesor bie mbi të paditurin shoqëria tregtare poseduese, ndërsa të paditurit e tjerë nuk duhet të bëhen pengesë për lirimin e dorëzimin e sendit, ndaj në këtë drejtim edhe ata janë të detyruar të respektojnë vendimin e gjykatës që rrjedh nga vendimmarrja e Gjykatës Kushtetuese.
12. Kriteret ligjore për identifikimin e juridiksionit të gjykatës shqiptare. (Fjalë kyçe: Përmbushje detyrimi kontraktor, marrëdhënie juridike me elementë të huaj, juridiksioni i gjykatës shqiptare, e drejta ndërkombëtare private, vendi i përmbushjes së detyrimit, juridiksion ndërkombëtar, caktimi me marrëveshje i juridiksionit ndërkombëtar)
Në vendimin nr.00-2024-2979, datë 03.07.2024, KCGJL shprehet se për mosmarrëveshjen juridiko-civile me elemente të huaj, si vend i përmbushjes së detyrimit për efekt të përcaktimit të juridiksionit sipas nenit 80 të ligjit nr.10428, datë 02.06.2011, do të konsiderohet vendi ku do të përmbushet detyrimi monetar, pra ku do të paguhet çmimi nga pala e paditur. Disa transaksione janë kryer në llogarinë e paditësit pranë bankës së nivelit të dytë në Republikën e Shqipërisë. Si rrjedhojë vendi i ekzekutimit të detyrimit është përcaktuar se është Republika e Shqipërisë. Transferimi me marrëveshje i juridiksionit ndërkombëtar të gjykatave shqiptare nuk duhet ngatërruar me caktimin me marrëveshje të këtij juridiksioni që do të përbënte një rast përjashtimor nga rregullat e përcaktimit të juridiksionit të përgjithshëm dhe atij ekskluziv.
13. Gjykata kompetente për korrigjimin e aktit të lindjes. (Fjalë kyçe: Korrigjim i aktit të lindjes, gjykata kompetente, ligj i posaçëm)
Në vendimin nr.00-2024-3264, datë 24.07.2024, KCGJL shprehet se në interpretim të nenit 38/1 të ligjit nr.10129, datë 11.5.2009, kur akti i lindjes i lëshuar në një shtet tjetër ka të dhëna të paplota apo të pasakta, vërtetimi i faktit bëhet nga gjykata e rrethit gjyqësor. Pavarësisht se padia i kundrejtohet një organi administrativ, në thelb kundërshtohet akti i nxjerrë nga një organ në një shtet të huaj, të cilin pala paditëse e konteston se ka pasaktësi. Ligji i posaçëm që ka rregulluar në mënyrë specifike marrëdhënien konkrete prevalon mbi parashikimin e posaçëm që përcakton ligji nr. 49/2012.
2. Jurisprudencë e GJEDNJ kundër Shqipërisë
1. Mospranim i pretendimit për shkeljen e të drejtës për të patur një vendim gjyqësor të ekzekutuar brenda afatit të arsyeshëm. (Fjalë kyçe: Afat i arsyeshëm, ekzekutim në afat të arsyeshëm, e drejtë prone, shterim i mjeteve të brendshme të ankimit)
Në çështjen Toshkëzi kundër Shqipërisë, kërkesa nr.4607/09, vendim i datës 2 korrik 2024, për moszbatimin e vendimit gjyqësor të formës së prerë brenda një afati të arsyeshëm për kthimin dhe kompensimin e pronës, GJEDNJ çmon se kërkesa është e papranueshme, pasi kërkuesi nuk ka ndërmarrë të gjitha hapat e nevojshëm për të vënë në ekzekutim vendimin gjyqësor që dispononte, duke mos shteruar mjetet e brendshme efektive të ankimit. Kërkuesi nuk ka kërkuar kthimin apo kompensimin e pronës pranë autoriteteve kompetente, e veçanërisht pas vitit 2015, kur u miratua edhe kuadri i ri ligjor për trajtimin e pronave të pakthyera apo të pakompensuara. https://hudoc.echr.coe.int/eng?i=001-235799
3. Pasqyrimi i aktiviteteve të Gjykatës së Lartë
Në datën 29 korrik 2024, Kryetari i Gjykatës së Lartë z. Sokol Sadushi zhvilloi një takim me Ambasadorin Britanik Alastair King-Smith, përpara largimit të tij nga vendi. Në takim u vlerësua partneriteti afatgjatë me Britaninë e Madhe, që siguron mbështetje të vazhdueshme për sistemin e drejtësisë në Shqipëri. https://www.gjykataelarte.gov.al/sq/lajme/media/ne-takimin-e-fundit-zyrtar-perpara-largimit-me-ambasadorin-britanik-ne-tirane-alastair-king-smith
4. Statistika
Vendime të dhëna nga Gjykata e Lartë për muajin korrik 2024
Kolegji Administrativ ka dhënë 269 vendime, nga të cilat 221 janë vendime themeli, 2 kompetencë/juridiksion, si dhe 46 pezullim ekzekutimi/revokim pezullimi/kërkesa të ndryshme.
Kolegji Civil ka dhënë 251 vendime, nga të cilat 220 janë vendime themeli, 4 kompetencë/juridiksion, si dhe 27 pezullim ekzekutimi/revokim pezullimi/kërkesa të ndryshme.
Kolegji Penal ka dhënë 244 vendime, nga të cilat 223 janë vendime themeli, 6 kompetencë/juridiksion, si dhe 15 pezullim ekzekutimi/revokim pezullimi/kërkesa të ndryshme.
Në total për muajin korrik 2024 janë dhënë 764 vendime gjyqësore.
5. Formati i rekursit në Gjykatën e Lartë
Gjykata e Lartë këshillon përdorimin e formatit të miratuar të rekursit, që gjendet në linkun: https://gjykata-media.s3.eu-central-1.amazonaws.com/format_rekursi_5207_1_3d
6. Vizitat në Gjykatën e Lartë (Gjykata e Hapur/Open court)
Gjykata e Lartë mundëson pjesëmarrjen e çdo të interesuari (qytetar, studiues, praktikant i së drejtës, student apo nxënës shkolle) në seanca gjyqësore apo që dëshiron të vizitojë institucionin, duke afruar veprimtarinë e saj të përditshme me publikun. Ky akses mundësohet përmes aplikimit të thjeshtë elektronik, duke plotësuar modulet (emër, mbiemër, email dhe përmbajtjen e mesazhit/arsyet e vizitës). Aplikoni duke vizituar linkun: https://www.gjykataelarte.gov.al/sq/akrediti
Kontakto:
Tel.: +355 4 2257304;
Fax: +355 (4) 228837;
Email: info@gjykataelarte.gov.al;
Adresa postare: Rruga: "Ibrahim Rugova", nr. 20, 1001, Tiranë, Shqipëri.