Gjykata e Lartë1. Jurisprudencë e përzgjedhur
Kolegji Administrativ i Gjykatës së Lartë
1. Padia për detyrimin e zyrës së gjendjes civile që të regjistrojë si prindër të fëmijës dy nëna nuk mund të ngrihet, pasi nuk gëzon mbrojtje ligjore. (Fjalë kyçe: bashkamësi, regjistrim në gjendjen civile i fëmijës, padi që nuk mund të ngrihet, kontroll incidental, interes i ligjshëm, interes i fëmijës, gjykatë referuese)
Në vendimin nr.00-2024-4149(323), datë 16.07.2024, për detyrimin e organit publik që të regjistrojë si prindër të fëmijës në gjendjen civile dy nëna, KAGJL vlerëson se ndodhemi përpara një padie që nuk mund të ngrihet, për sa kohë që padia nuk gëzon mbrojtje juridike nga ndonjë normë e së drejtës pozitive në legjislacionin shqiptar. Pala paditëse nuk provoi interesin e ligjshëm të fëmijëve, duke mos argumentuar para gjykatës, nëse kërkimi për njohjen e bashkamësisë do të sillte përftime për fëmijët e mitur. Kodi i Familjes dhe Kodi Civil sigurojnë mbrojtje të plotë të të drejtave pasurore dhe jopasurore të fëmijëve, përmes amësisë së nënës biologjike. Një kontroll incidental për kushtetutshmërinë e dispozitave të Kodit të Familjes nga Gjykata Kushtetuese nuk ka vend për t’u iniciuar nga GJL, pasi nuk plotësohen kushtet për këtë qëllim.
2. Detyrat e komisionit disiplinor në procedurat administrative disiplinore ndaj nëpunësit civil. (Fjalë kyçe: masë disiplinore, largim nga shërbimi civil, nëpunës civil, hetim i plotë administrativ, shkelje shumë e rëndë, shkelje me faj, procedurë administrative disiplinore, individualizim i masës disiplinore, proporcionalitet)
Në vendimin nr.00-2024-3858(351), datë 11.09.2024, KAGJLvlerëson se është detyrë e komisionit disiplinor që të kryejë një hetim të plotë administrativ, me qëllim që të individualizojë drejt masën disiplinore ndaj nëpunësit civil. Individualizimi i masës disiplinore bëhet nga komisioni disiplinor, duke zbatuar parimin e proporcionalitetit në raport me shkeljen konkrete të kryer. Nëpunësit e administratës doganore mbajnë përgjegjësi disiplinore gjatë ushtrimit të detyrave funksionale, vetëm për shkeljet me faj të legjislacionit doganor.
3. Gjykata kompetente për aktet administrative individuale të Këshillit të Lartë Gjyqësor (KLGJ) dhe për veprimet administrative të kryera nga kryetari i KLGJ. (Fjalë kyçe: gjykatë kompetente, kompetencë funksionale, veprim administrativ, akt administrativ individual, akt i KLGJ, veprim i kryetarit të KLGJ)
Në vendimin nr.00-2024-3625, datë 24.09.2024, KAGJL vlerëson se kompetenca funksionale për shqyrtimin e mosmarrëveshjeve që burojnë nga aktet administrative individuale të Këshillit të Lartë Gjyqësor, i përket Gjykatës Administrative të Apelit. Kthim përgjigja (shkresa) e kryetarit të KLGJ, ku magjistrati gjyqtar sqarohet për vlerësimin e rezultateve në punë, nuk përbën një akt administrativ individual të KLGJ, e për pasojë duhet të shqyrtohet nga Gjykata Administrative e Shkallës së Parë Tiranë.
4. Diskriminimi për shkak të mosveprimit të organit publik. (Fjalë kyçe: diskriminim, mosveprim i organit publik, mbrojtje nga diskriminimi, shkak i diskriminimit, bindje politike, trajtim i diferencuar, kushte të njëjta, kushte të ngjashme)
Në vendimin nr.00-2024-3621(370), datë 24.09.2024, KAGJL vlerëson se shkaqet për të cilat ndalohet diskriminimi nuk janë shteruese, pasi përveç atyre që parashikon Kushtetuta dhe ligji për mbrojtjen nga diskriminimi, mund të rezultojnë rast pas rasti edhe shkaqe të tjera nga tërësia e rrethanave të çështjes. Bindjet politike përbëjnë shkaqe kushtetuese për të cilat diskriminimi është i ndaluar. Mosveprimet e kryera nga ana e autoriteteve publike, që krijojnë baza për mohimin e barazisë ndaj një personi, e që i ekspozon ata ndaj një trajtimi të padrejtë dhe jo të barabartë, kur ndodhen në rrethana të njëjta ose të ngjashme me persona të tjerë, gëzon të njëjtën mbrojtje ligjore për ndalimin e diskriminimit, sikurse në rastin kur autoriteti publik ka kryer diskriminim me veprim. Mbrojtja nga diskriminimi nuk kushtëzohet vetëm në rastet kur organi publik kryen me veprime trajtim të diferencuar të personave që ndodhen në kushte të njëjta ose të ngjashme, por ajo shtrihet edhe në rastin e mosveprimit.
5. Bashkimi i kërkimeve të thjeshta në një kërkesëpadi. Vendim i parekursueshëm në Gjykatën e Lartë. (Fjalë kyçe: kërkesëpadi, bashkim kërkimesh, kërkime të thjeshta, vlerë e objektit të padisë, vendim i parekursueshëm, dyzetfish i pagës minimale)
Në vendimin nr.00-2024-3676, datë 25.09.2024, KAGJLvlerëson se kur kërkesëpadia përmban disa kërkime të thjeshta (jo të ndërvarura ndërmjet tyre), që mund të qëndrojnë si padi më vete, gjykata i trajton të pavarura nga njëra-tjetra kërkimet dhe jo si shumatore aritmetike të vlerës së të gjitha kërkimeve. Për sa kohë që aktet e kundërshtuara gjyqësisht përcaktojnë dënime administrative për çdo paditës dhe masa e gjobës së vendosur ndaj secilit prej tyre është nën dyzetfishin e pagës minimale në shkallë vendi, ndodhemi përpara një vendimi të parekursueshëm në Gjykatën e Lartë për shkak të vlerës së objektit të padisë.
6. Garancitë e procesit të rregullt ligjor gjatë gjykimit të përshpejtuar në apel në dhomën e këshillimit. (Fjalë kyçe: gjykim në apel, gjykim në dhomë këshillimi, njoftim i palëve, gjykim i përshpejtuar, akt ekspertimi, metodologji e llogaritjes së dëmit, parimi i arsyetimit të vendimit)
Në vendimin nr.00-2024-4444(408), datë 08.10.2024, KAGJLvlerëson se, kur gjykata e apelit vendos të gjykojë çështjen në mënyrë të përshpejtuar, ka detyrimin që të njoftojë individualisht palët pjesëmarrëse për datën dhe orën e saktë të seancës, edhe sikur seanca të zhvillohet në dhomë këshillimi, pasi përndryshe cenohet parimi i kontradiktoritetit dhe iu mohohet palëve e drejta për t`u dëgjuar dhe paraqitur parashtrime me shkrim. Kur gjykata vendos që të marrë provën përmes ekspertit, ajo duhet të pasqyrojë rezultatet e aktit të ekspertimit në përmbajtjen e vendimit, sepse në të kundërt shkel parimin e arsyetimit të vendimit. Kur vendoset të merret prova me ekspert, në funksion të hetimit të plotë dhe të gjithanshëm të çështjes, gjykata duhet t`u japë përgjigje shteruese pretendimeve të palëve për metodologjinë e përdorur për llogaritjen e vlerës së dëmit efektiv në formën e humbjes së pësuar dhe fitimit të munguar.
7. Gjykata kompetente për mbrojtjen e servitutit të kalimit. (Fjalë kyçe: gjykatë kompetente, kompetencë lëndore, shkak ligjor i padisë, servitut kalimi, mbrojtje e servitutit)
Në vendimin nr.00-2024-4196, datë 22.10.2024, KAGJL vlerëson se është shkaku ligjor i padisë elementi thelbësor që ndihmon gjykatën për të përcaktuar kompetencën lëndore të gjykatës në zgjidhjen e mosmarrëveshjes. Mbrojtja e servitutit të kalimit sipas nenit 292 të Kodit Civil është një padi reale civile, që shërben për mbrojtjen e një të drejte reale nga cenimet e të tretëve, e për pasojë mosmarrëveshjet që lindin mbi këtë institut juridik, duhet të shqyrtohen nga gjykata civile.
8. Gjykata kompetente për pavlefshmërinë e njoftimit të vendimit gjyqësor apo akteve të tjera procedurale. (Fjalë kyçe: gjykatë kompetente, kompetencë lëndore, njoftim i pavlefshëm, vendim përfundimtar, akte procedurale, rivendosje në afat)
Në vendimin nr.00-2024-4198, datë 22.10.2024, KAGJL vlerëson se gjykata kompetente për të shqyrtuar pavlefshmërinë e njoftimit (aktit procedural) të vendimit përfundimtar për zgjidhjen e martesës është gjykata civile, pasi kjo gjykatë ka zhvilluar procesin gjyqësor të themelit ku janë realizuar njoftimet. Kur paraqitet një kërkesë për rivendosjen në afat të ankimit, kërkuesi ka detyrimin që t’i bashkëlidhë kërkesës edhe ankimin për të cilin kërkohet rivendosja në afat.
9. Vlerësimi financiar i pronës së njohur për kompensim dhe efektet prapavepruese të vendimit të Gjykatës Kushtetuese. (Fjalë kyçe: vlerësim financiar prone, pronë e njohur për kompensim, efekt prapaveprues, vendim i Gjykatës Kushtetuese, zë kadastral, standard minimal vlerësimi, 10% e zërit aktual kadastral, regjimi juridik i pronës)
Në vendimin nr.00-2024-4375(459), datë 31.10.2024, KAGJL vlerëson se vendimi i Gjykatës Kushtetuese ka efekt prapaveprues ndaj çështjeve që shqyrtohen nga gjykatat, derisa vendimet e tyre nuk kanë marrë formë të prerë. Kur Gjykata Administrative e Apelit shqyrton pretendimet e ish-pronarëve që kundërshtojnë vlerësimet financiare të pronave nga Agjencia e Trajtimit të Pronave, duhet të kryejë një hetim të plotë e të gjithanshëm, me qëllim që të përcaktojë regjimin juridik të pronës para shpronësimit. Në këto çështje, gjykata duhet të mbajë në konsideratë vendimin nr. 4/2021 të Gjykatës Kushtetuese dhe vendimin e GJEDNJ “Beshiri kundër Shqipërisë”, me qëllim që të përcaktojë standardin minimal 10% për diferencën në vlerësim midis zërit kadastral të sotëm dhe atij të kohës së shpronësimit.
10. Ndërgjyqësia pasive në proceset gjyqësore të nisura për shpërblimin e dëmit pasuror dhe jopasuror nga aksidentet rrugore. (Fjalë kyçe: ndërgjyqësi pasive, palë e paditur, aksident rrugor, dëm pasuror, dëm jopasuror, entet pronare të rrugëve, Autoriteti Rrugor Shqiptar)
Në vendimin nr.00-2024-4394(449), datë 31.10.2024, KAGJL vlerëson se Autoriteti Rrugor Shqiptar është organi shtetëror që ka për detyrë të administrojë rrugët shtetërore. Entet pronare të rrugëve janë subjektet që mbartin përgjegjësinë ligjore për menaxhimin e rrjetit të rrugëve shtetërore sipas Kodit Rrugor dhe legjislacionit përkatës, duke mirëmbajtur e pastruar rrugët, pjesët që i përkasin rrugës, si dhe duke kryer kontrollin teknik të gjendjes së rrugëve. ARRSH nuk është ent pronar rrugësh. Pozitën e palës së paditur në proceset gjyqësore të nisura për shpërblimin e dëmit pasuror dhe jopasuror nga aksidentet rrugore, kur dëmi ka ardhur si pasojë e mungesës së mirëmbajtjes së rrugës, e kanë entet pronare të rrugëve.
11. Njoftimi i vendimit gjyqësor personit juridik privat është i vlefshëm kur i dorëzohet një personi që punon në qendrën e tij. (Fjalë kyçe: rivendosje në afat, njoftim, person juridik privat, punonjës i personit juridik privat, përfaqësues i personit juridik privat, i ngarkuar për marrjen e akteve, bashkim operatorësh ekonomikë, përfaqësues i përbashkët)
Në vendimin nr.00-2024-4428(449), datë 07.11.2024, KAGJL vlerëson se instituti procedural i rivendosjes në afat i jep elasticitetin e nevojshëm procedurave gjyqësore dhe shërben për mbrojtjen dhe garantimin e procesit të rregullt ligjor. Rivendosja në afat është mjeti mbrojtës për palën që humb afatin e ankimit pa fajin e saj. Neni 130 i Kodit të Procedurës Civile përcakton se njoftimi i personave juridikë privatë bëhet në qendrën e tyre dhe i dorëzohet përfaqësuesit ose personit të ngarkuar për të marrë aktet, e në mungesë të tyre, një personi tjetër që punon në këtë qendër të personit juridik. Për sa kohë që njoftimi i vendimit gjyqësor është bërë tek një punonjës i personit juridik privat, në mungesë të përfaqësuesit të tij apo të personit të ngarkuar për marrjen e akteve, atëherë ai mbetet i ligjshëm dhe nuk ka vend që të pranohet kërkesa për rivendosje në afat. Përfaqësuesi i një bashkimi operatorësh ekonomikë, që është caktuar me marrëveshje zyrtare bashkëpunimi dhe është pajisur me tagër të posaçëm përfaqësimi, konsiderohet i mjaftueshëm për të përmbushur detyrimet e njoftimeve procedurale, duke siguruar vlefshmërinë e tyre për të gjithë anëtarët e bashkimit.
Kolegji Penal i Gjykatës së Lartë
1. Konvertimi i dënimit të dhënë nga gjykata e huaj, duke caktuar ndaj shtetasit shqiptar njëkohësisht dy dënime kryesore, me burgim dhe me gjobë (Fjalë kyçe: njohje e vendimit penal të huaj, konvertim dënimi, dënim me burg, dënim me gjobë)
Në vendimin nr. 00-2024-1096(147), datë 13.06.2024, KPGJL arsyeton se gjykata, në zbatim të nenit 516 të Kodit të Procedurës Penale, konverton dënimin e caktuar në vendimin e huaj, në një nga dënimet e parashikuara për të njëjtin fakt nga ligji shqiptar (me gjobë ose burgim). Edhe në rastet kur dispozita penale konkrete parashikon dënimin me gjobë, ajo nuk caktohet së bashku me dënimin me burgim, pasi ligjvënësi ka përdorur lidhëzën “ose”, duke ndryshuar këto dispozita që më herët përmbanin lidhëzën “dhe”, referuar kushteve të nenit 47 të Kodit Penal.
2. Vendimi për zbatimin e ligjit për amnistinë i miratuar nga ligjvënësi në shtetin e huaj edhe për kërkuesin e dënuar nga gjykatat e huaja merret nga gjykata e huaj kompetente dhe jo nga ajo shqiptare. (Fjalë kyçe: ekzekutim vendimi, njohje e përfitimit të amnistisë, dënim i huaj, njohje e vendimit penal të huaj)
Në vendimin nr. 00-2024-1111(146), datë 13.06.2024, KPGJL thekson se gjykata shqiptare nuk ka asnjë mekanizëm ligjor për të zbatuar drejtpërdrejt ligjin e një shteti tjetër, përveç përmes procedurës së njohjes dhe ekzekutimit të vendimit penal të huaj në Shqipëri. Është kjo arsyeja që ligjvënësi, në zbatim të parimit të reciprocitetit, ka parashikuar edhe në këtë moment procedural (pra, gjatë fazës së ekzekutimit) ndërhyrjen e ministrit të Drejtësisë për të garantuar të drejtat procedurale të shtetasve shqiptarë. Verifikimi nëse duhet zbatuar apo jo ligji për amnistinë i miratuar nga ligjvënësi në shtetin e huaj (Itali) edhe për kërkuesin e dënuar nga gjykatat e huaja në Itali, nuk i takon gjykatave shqiptare, por është një vendim që duhet marrë pikërisht nga gjykata e huaj kompetente. Vetëm pasi të merret një përgjigje pozitive nga autoritetet e huaja, nëpërmjet rrugës ligjore, atëherë mund të kërkohet njohja e këtij përfitimi në territorin shqiptar.
3. Rrethanat e faktit për të identifikuar nëse jemi para ndryshimit të akuzës apo ndryshimit të cilësimit juridik të veprës penale. (Fjalë kyçe: fakt penal, cilësim juridik, ndryshim i cilësimit juridik, ndryshim i akuzës)
Në vendimin nr. 00-2024-1166(150), datë 27.06.2024, KPGJL thekson se gjykata, në emër të dhënies së drejtësisë, nuk legjitimohet të vlerësojë ato veprime apo mosveprime të të pandehurit, të cilat, ndonëse rezultojnë gjatë shqyrtimit gjyqësor, nuk i janë atribuuar të pandehurit me aktin e njoftimit të akuzës apo në kërkesën për gjykim, pasi nëse do të ndodhte kjo gjë, cenohet e drejta e të pandehurit për proces të rregullt ligjor. Gjykata ushtron të drejtën e saj për ndryshimin e cilësimit juridik të veprës penale vetëm në lidhje me faktin e përshkruar në kërkesën për gjykim, që i është njoftuar/komunikuar të pandehurit dhe për të cilin prokuroria ka ushtruar ndjekjen penale, duke i atribuuar një akuzë konkrete.
4. Vendimet për të cilët kërkohet ekstradimi duhet të jenë përfundimtare. (Fjalë kyçe: ekstradim, vendim përfundimtar, afat parashkrimi)
Në vendimin nr. 00-2024-1319(184), datë 16.07.2024, KPGJL vlerëson se vendimet për të cilat kërkohet ekstradimi duhet të jenë përfundimtare (të përbëjnë “gjë të gjykuar”) në kuptimin substancial. Afati i përllogaritjes për efekt parashkrimi të veprave penale nuk duhet të fillojë nga dita që prokurori bën bashkimin e dënimeve për disa vepra penale, por nga dita që çdo vendim i gjykatës përbën “gjë të gjykuar".
5. Kompetenca lëndore për kërkesën “Revokim i masës së sigurimit” i takon gjykatave të faktit, jo Gjykatës së Lartë. (Fjalë kyçe: revokim, masë sigurimi, revokim mase sigurimi, kontradiktoritet i palëve)
Në vendimin nr. 00-2024-1370, datë 23.07.2024, KPGJL vlerëson se kërkesat e palëve me objekt ‘revokimin e masës së sigurimit’ gjen zbatim efektiv vetëm për gjykatat e faktit të shkallës së parë dhe të dytë. Gjykatat e faktit nuk mund të bëjnë konflikt kompetence me Gjykatën e Lartë, e cila është një gjykatë me juridiksion ekskluzivisht ligjor. Revokimi i masës së sigurimit duhet të realizohet në prezencë të kontradiktoritetit të palëve, të cilët paraqesin provat përkatëse apo duan të marrin pjesë në gjykim, si dhe do të kenë mundësinë të debatojnë mbi provat e paraqitura nga pala tjetër.
6. Dallimi mes parashkrimit të ekzekutimit të dënimit dhe vuajtjes së plotë të dënimit në legjislacionin penal. (Fjalë kyçe: parashkrim i ekzekutimit të dënimit, vuajtje e plotë e dënimit, kontroll i ekzekutimit të vendimeve, prokuror i ekzekutimit, koha e vuajtur e dënimit)
Në vendimin nr. 00-2024-1447(208), datë 17.09.2024, KPGJL vlerëson se “parashkrimi i ekzekutimit të dënimit” dhe “vuajtja e plotë e dënimit” janë dy koncepte të ndryshme dhe gjejnë rregullime të ndryshme në legjislacionin penal. Parashkrimi i ekzekutimit të dënimit zbatohet nga gjykatat kur përmbushen kushtet dhe kriteret e parashikuara në nenin 68 të Kodit Penal, ndërsa verifikimi dhe më tej konstatimi se dënimi është vuajtur plotësisht dhe i dënuari nuk ka më detyrime ndaj shtetit, nuk mund të bëhet nëpërmjet këtij mjeti juridik. Vënia në ekzekutim dhe kontrolli i ekzekutimit të vendimeve penale bëhet nga prokurori. Prokurori i ekzekutimit ka kompetencën për të përllogaritur saktësisht kohën që i dënuari ka për të vuajtur dënimin, duke marrë informacion lidhur me çdo pretendim të tij sa i përket vuajtjes së dënimit nëpërmjet formave alternative për llogari të një vendimi gjyqësor të formës së prerë. Në momentin që vendimi gjyqësor i formës së prerë është vënë në ekzekutim, prokurori ka kompetencën jo vetëm të mbikëqyrë ekzekutimin e tij por edhe të konstatojë nëse ka ndryshime në kohën e përllogaritur për vuajtjen e dënimit.
7. Efektet e ndërsjella mes procesit civil dhe penal për deklarimin e dokumentit të falsifikuar. (Fjalë kyçe: deklarim i falsitetit të dokumentit, asgjësimi i një dokumenti unik, dokument i falsifikuar)
Në vendimin nr. 00-2024-1500(216), datë 19.09.2024, KPGJL arsyeton se për gjykatën që shqyrton pasojat civile, vendimi penal është i detyrueshëm vetëm për sa i përket faktit nëse vepra penale është kryer dhe nëse është kryer nga i gjykuari. Në procesin penal, çdo vendimmarrje në fajësinë e të pandehurit apo në deklarimin e falsitetit të dokumenteve vjen kurdoherë pas një bindjeje tej çdo dyshimi të arsyeshëm. Në të kundërt, parimi i bindjes tej çdo dyshimi të arsyeshëm nuk është i zbatueshëm në procesin civil kur përgjithësisht është pranuar parimi i ekzistencës së faktit më të mundshëm. Lidhur me pretendimin se a duhet të asgjësohet një dokument unik që nuk ka mundësi të përpilohet përsëri nëse çështja është duke u shqyrtuar civilisht, pasja e një procesi gjyqësor civil nuk e kushtëzon gjykatën penale për deklarimin e dokumentit të falsifikuar. Deklarimi i falsitetit dhe asgjësimi i tij nuk kushtëzohet nga fakti nëse dokumenti është unik apo jo, por mjafton të vërtetohet që dokumenti është i falsifikuar dhe në këtë rast gjykata do të vendosë deklarimin e tij si të falsifikuar.
8. Kushtet për lejimin e ekstradimit nuk janë të barabartë me kushtet për ndalimin e tij. (Fjalë kyçe: lejim ekstradimi, kusht ndalues i ekstradimit, kushtet lejuese të ekstradimit, garantimi i së drejtës së lirisë, garantimi i së drejtës së sigurisë, parimi i specialitetit)
Në vendimin nr. 00-2024-1533(222), datë 24.09.2024, KPGJL arrin në përfundimin se përjashtimi i shtetit kërkues, në këtë rast Federata Ruse nga Këshilli Evropës, nuk kushtëzon zbatimin e detyrimit të shtetit tonë për ekstradimin e shtetasve rusë për llogari të autoriteteve gjyqësore ruse, në zbatim të Konventës Evropiane për Ekstradimin dhe asaj për Marrëdhëniet Juridiksionale me Jashtë, përderisa shteti kërkues i përmbahet angazhimit në kuadër të kësaj Konvente. Kushtet për t’u lejuar ekstradimi nuk janë të tilla që vërtetimi i tyre, automatikisht dhe detyrimisht, sjell si pasojë rrëzimin e kërkesës për ekstradim. Vërtetimi i një prej tyre, në mungesë të vërtetimit të kushteve ndaluese, mbart elemente të diskrecionit të gjykatës. Kjo do të thotë se vërtetimi i kushteve për lejimin e ekstradimit nuk janë të barabarta me kushtet për ndalimin e tij dhe nuk mund të interpretohen si të tilla. Nuk jemi përpara një kushti ndalues të ekstradimit, kur sipas nenit 32/dh të ligjit 10193/2009, kërkesa për azil është paraqitur në të njëjtin moment me kërkesën për ekstradim, por vetëm kur ajo është paraqitur përpara se të dorëzohet një e tillë përpara Autoriteteve të Drejtësisë Shqiptare.
9. Kushti për të vendosur sekuestron preventive është dyshimi se vepra penale ekziston. (Fjalë kyçe: sekuestro preventive, dyshim i bazuar në prova, dyshim se vepra penale ekziston)
Në vendimin nr. 00-2024-1626(246), datë 10.10.2024, KPGJL thekson se, në ndryshim nga caktimi i masave të sigurimit personal që kanë si kusht sine qua non ekzistencën e dyshimit të arsyeshëm të bazuar në prova, në rastin e sekuestros preventive, mjafton të krijohet një dyshim se vepra penale ekziston (fumus delicti).
10. Rrezikshmëria jo e madhe e autorit kushtëzon zbatimin e bashkimit të dënimeve. (Fjalë kyçe: bashkim dënimesh, rrezikshmëria jo e madhe e autorit, sistem thithje të dënimeve më të lehta)
Në vendimin nr. 00-2024-1665(251), datë 15.10.2024, KPGJL vlerëson se për aplikimin/zbatimin e nenit 55/3 të Kodit Penal, ekzistenca e kushtit “rrezikshmëria jo e madhe e autorit” është i panegociueshëm, që do të thotë se mungesa e tij pamundëson aplikimin/zbatimin e kësaj mënyre bashkimi dënimesh (sistemin e thithjes së dënimeve më të lehta nga dënimi më i rëndë gjatë bashkimit të dënimeve). Rrezikshmëria e autorit vlerësohet në raport të drejtë me rrezikshmërinë e veprës penale të kryer, marzhet e dënueshmërisë së saj, shkaqet, motivet, dashjen, qëllimin, pasojat, rrethanat lidhur me natyrën, llojin, mjetet, kohën, vendin e kryerjes së veprës penale, sjelljen dhe qëndrimin e mëpasshën të autorit, qenien ose jo recidivist, si dhe rrethanat e tjera të jetës individuale, familjare e sociale të tij (autorit) etj.
Kolegji civil i Gjykatës së Lartë
1. Vlerësimi i shkaqeve për zgjidhjen e menjëhershme e të pajustifikuar të kontratës së punës. (Fjalë kyçe: zgjidhje e kontratës së punës, raport mjekësor, prova shkresore, shkak i justifikuar, veprimtari tregtare jokonkurrente)
Në vendimin nr.00-2024-2268(335) datë 29.05.2024, KCGJL çmon se e paditura (shoqëria e telekomunikacionit si punëdhënëse) kishte detyrimin që të verifikonte protokollin dhe rregullat e ndjekura në lëshimin e raportit mjekësor nga organi i posaçëm, mjeku i familjes/spitalor dhe në rast se do të kishte dyshime në lidhje me mënyrën e lëshimit apo konkluzioneve të nxjerra prej raportit, kishte detyrimin që t’i kërkonte palës paditëse t’i nënshtrohej ekzaminimit mjekësor. Kolegji konkludon se provat shkresore nuk mund të zhvlerësohen me thëniet e dëshmitarëve, edhe në kushtet kur nuk vërtetohet në mënyrë të pakontestueshme gjendja shëndetësore e palës paditëse, në kohën kur ka lindur mosmarrëveshja. KCGJL thekson se, edhe pse pala paditëse ka kryer paralelisht disa punë të tjera përveç asaj që ka pasur pranë palës së paditur, kjo nuk mund të përbëjë shkak të justifikuar dhe të mjaftueshëm për të konkluduar se jemi para rastit të përcaktuar në nenin 153 të Kodit të Punës, në kushtet kur ka rezultuar i provuar fakti se veprimtaria tregtare dhe fusha e veprimit të dy shoqërive të tjera ku ka qenë i punësuar paditësi nuk janë konkurrente me shoqërinë e paditur në këtë gjykim, si dhe veprimtaria e tyre tregtare dhe profesionale është tërësisht e ndryshme
2. Momenti i kërkimit të dëmit jashtëkontraktor për ngjarjet aksidentale. (Fjalë kyçe: afat parashkrimi, shpërblim dëmi, aksident)
Në vendimin nr. 00-2024-2835(392), datë 26.06.2024, për pretendimet për parashkrimin e padisë, KCGJL vlerëson se padia objekt gjykimi, duke patur në vëmendje dhe trajtimin e bërë në vendimin njësues nr.12/2007, është një padi që rrjedh nga shpërblimi i dëmit jashtëkontraktor dhe i nënshtrohet afatit 3 (tre) vjeçar të parashkrimit, sipas nenit 115/dh të Kodit Civil. Ajo është ngritur brenda afatit dhe afati i parashkrimit ka filluar të ecë në datën kur ka ndodhur ngjarja aksidentale dhe jo në datën kur ka marrë formë të prerë vendimi i gjykatës që ka deklaruar fajtor personin përgjegjës për aksidentin. Kolegji thekson se pala paditëse ka të drejtë të kërkojë shpërblimin e dëmit nga i padituri civilisht përgjegjës për dëmin e shkaktuar, menjëherë me ndodhjen e faktit të paligjshëm dhe kjo e drejtë nuk kushtëzohet nga marrja në përgjegjësi penale e personit penalisht përgjegjës për aksidentin.
3. Gjykata kompetente për paditë e njohjes pronar me parashkrim fitues të banesave ish-pronë private. (Fjalë kyçe: kompetencë tokësore, legjitimitet pasiv, kontratë privatizimi, njohje pronar, parashkrim fitues)
Në vendimin nr.00-2024-2723(386), datë 26.06.2024, KCGJL konkludon se për bazueshmërinë e rekursit të paraqitur nga e paditura kundërpaditëse, e cila nuk ka ushtruar ankim ndaj vendimit të gjykatës së shkallës së parë, ky vendim në kuptim të nenit 451/b të Kodit të Procedurës Civile ka marrë formë të prerë për atë palë në kuptimin e “gjësë së gjykuar”. Në kushtet kur janë shteruar mjetet e zakonshme të ankimit, nuk mund të përdoret si mjet procedural as rekursi, i cili përbën gjithashtu një mënyrë të zakonshme ankimi ndaj vendimit të gjykatës. Lidhur me bazueshmërinë e shkaqeve të parashtruara në rekurs nga pala paditëse e kundërpaditur për mungesën e kompetencës tokësore, Kolegji vlerëson se pavarësisht ndryshimeve të mëvonshme të kompetencës tokësore të gjykatës lidhur me vendndodhjen e pasurisë duhet të gjejë zbatim parimi procedural civil perpetuatio fori, sipas të cilit kompetenca e gjykatës përcaktohet në momentin e paraqitjes së padisë në gjykatë, pavarësisht ndryshimeve të mëvonshme të faktit apo ligjit. Sa i përket vlefshmërisë së kontratave të privatizimit dhe bazueshmërisë së padisë së fitimit të pronësisë me parashkrim fitues, Kolegji konkludon se kontratat e privatizimit në favor të paditësve të kundërpaditur kanë qenë veprime juridike të ndaluara nga ligji, për shkak të objektit të tyre (banesat ish-pronë private).
4. Paparashkrueshmëria e detyrimit të punëdhënësit për pagimin e kontributeve të sigurimeve. (Fjalë kyçe: afat parashkrimi, marrëdhënie pune, kontributet e sigurimeve shoqërore, kontratë pune, të drejtat e punëmarrësit, vërtetim i faktit juridik)
Në vendimin nr.00-2024-3220(437), datë 19.07.2024, KCGJL vlerëson se kërkimi për vërtetimin e faktit të vjetërsisë në punë dhe për pasojë detyrimi i punëdhënësit për pagimin e kontributeve të sigurimeve janë kërkime të paparashkrueshme. Arsyeja qëndron tek cilësia që ka padia për njohjen e një marrëdhënieje juridike ose të një të drejte dhe nga parashikimi specifik sipas nenit 113 të Kodit Civil, se paditë e njohjes nuk parashkruhen. Pagimi i kontributeve të sigurimeve shoqërore, varet nga kërkimi për njohjen e faktit të marrëdhënies juridike të punës.
5. Rrethi i trashëgimtarëve të paaftë për punë, si subjekte të përfitimit të rezervës ligjore. (Fjalë kyçe: rezervë ligjore, trashëgimtar i paaftë për punë, trashëgimi ligjore, radha e trashëgimisë)
Në vendimin nr.00-2024-4335(416), datë 03.07.2024, KCGJL konkludon se si trashëgimtarë të paaftë për punë që përfitojnë nga rezerva ligjore, krahas fëmijëve të mitur dhe trashëgimtarëve të tjerë të mitur me zëvendësim mund të rezultojnë të gjithë trashëgimtarët e denjë të de cuius-it, nga të gjitha radhët e trashëgimisë ligjore, mjafton që radha në të cilën ata bëjnë pjesë të thirret në trashëgim dhe të plotësohen në mënyrë kumulative kushtet e nenit 363 të Kodit Civil si dhe një nga kushtet e nenit 371 të Kodit Civil.
6. Masa e dëmshpërlimit dhe barra e provës në rastet e dëmeve jashtëkontraktore jopasurore. (Fjalë kyçe: shpërblim i dëmit jashtëkontraktor, vlera e dëmshpërblimit, barra e provës, përgjegjësia civile, dëmi moral, dëmi jopasuror)
Në vendimin nr.00-2024-3968(464), datë 24.07.2024, KCGJL shprehet se dëmi i pësuar nga pala e dëmtuar përfshihet konkretisht në kategorinë e rrahjes dhe masa e shpërblimit për këto raste mbetet në diskrecionin e gjykatës, duke mbajtur në tërësi të gjitha veçoritë e rastit, të cilat mund të rëndojnë përjetimet negative të personit lidhur me cenimin e dinjitetit të tij, i cili detyrimisht duhet të respektohet e të mbrohet. Për sa i përket arsyetimit lidhur me transferimin e barrës së provës mbi paditëset për vërtetimin e fajësisë së të paditurit, Kolegji vlerëson se vendimi i gjykatës së apelit vjen në kundërshtim me parimet e barrës së provës në procesin civil në rastet e dëmeve jashtëkontraktore. Kërkimi i shpërblimit të dëmit jashtëkontraktor nuk kushtëzohet nga vërtetimi i fajësisë dhe i personit shkaktar të dëmit nga vendimi penal.
7. Të drejtat e pronësisë së bashkëshortëve mbi aksionet e shoqërisë tregtare të fituara gjatë martesës dhe veprimet që kapërcejnë administrimin e zakonshëm të pasurisë në bashkësi. (Fjalë kyçe: bashkësi ligjore, pasuri e përbashkët, pasuri e fituar gjatë martesës, bashkëpronësi, pasuri e bashkëshortëve, bashkëshortë, bashkëzotërues i kuotave, aksione, administrim i zakonshëm, veprime të pavlefshme juridike)
Në vendimin nr.00-2024-3446(476), datë 11.9.2024, KCGJL çmon se marrëdhëniet pasurore midis bashkëshortëve do t’i nënshtrohen rregullimeve të Kodit të Familjes aktual, pavarësisht nga data e lidhjes së martesës. Kolegji evidenton se nga interpretimi i nenit 76 të Kodit të Familjes, veprimtaria tregtare e krijuar gjatë martesës është pjesë e bashkësisë ligjore, krahas pasurive dhe të ardhurave të tjera. Mosregjistrimi i bashkëshortes si bashkëzotëruese e kuotave apo aksioneve në një shoqëri tregtare nuk i zhbën të drejtat që rrjedhin për të nga bashkësia ligjore, si një bashkëpronësi në tërësi, pa kuota përkatësie, në të cilën secili është titullar i të drejtave mbi pasurinë dhe jo mbi pjesët e përcaktuara të saj. Kryerja e veprimeve që kapërcejnë administrimin e zakonshëm të pasurisë në bashkësi prek bashkërisht të dy bashkëshortët, ndaj lidhja e një kontrate shitblerje aksionesh përbën një veprim që kapërcen administrimin e zakonshëm të pasurisë në bashkësi, pasi nëpërmjet saj realizohet në mënyrë përfundimtare kalimi i pronësisë dhe i të drejtave. Bashkëshorti, i cili nuk ka dhënë miratimin për një veprim që tejkalon kufijtë e administrimit të zakonshëm të bashkësisë, ka të drejtë të kërkojë anulimin e këtij veprimi juridik brenda 1 (një) viti nga marrja dijeni për kryerjen e tij.
8. Afati i paraqitjes së padisë për pavlefshmërinë e titullit ekzekutiv. (Fjalë kyçe: titull ekzekutiv, pavlefshmëria e titullit ekzekutiv, ekzekutim i detyrueshëm, debitor, kreditor)
Në vendimin nr.00-2024-4005(567), datë 18.10.2024, KCGJL çmon se, përveç përcaktimeve lidhur me rastet se kur mund të kërkohet pavlefshmëria e titullit ekzekutiv, ligjvënësi ka përcaktuar në paragrafin e parë të nenit 609 të Kodit të Procedurës Civile se afati për të paraqitur këtë kërkesëpadi është 30 ditë nga marrja dijeni për fillimin e ekzekutimit të detyrueshëm. Ky parashikim nuk mund të interpretohet se paditësi ka të drejtë për të vepruar vetëm brenda afatit 30 ditor nga fillimi i ekzekutimit të detyrueshëm të titullit ekzekutiv. Gjatë shqyrtimit të padisë për pavlefshmërinë e titullit ekzekutiv, krijohet një “gjykim themeli”, që konsiderohet plotësisht i pavarur në lidhje me ekzekutimin e titullit ekzekutiv (vendimit gjyqësor) nga ana e permbaruesit. Kjo padi mund të ngrihet si përpara, ashtu dhe pas fillimit të ekzekutimit të detyrueshëm nga ana e organeve të përmbarimit.
2. Jurisprudencë e GJENDJ kundër Shqipërisë
1. Mospranim i pretendimit për cenimin e posedimit të qetë të pronës. (Fjalë kyçe: posedim i qetë, e drejtë prone, gjykim i drejtë, shterim i mjeteve efektive të ankimit, urdhër sekuestrimi, proporcionalitet)
Në çështjen“Përparimi SHA Company dhe tre të tjerë kundër Shqipërisë”, kërkesa nr. 48729/08, vendimi i datës 15 tetor 2024, për cenimin e posedimit të qetë të pronës, si dhe shkeljen e gjykimit të drejtë, për shkak të sekuestrimit të aseteve të shoqërive tregtare me urdhër të prokurorit, GJEDNJ vlerëson se kërkesa është e pabazuar, pasi sekuestroja e fillestare e vendosur mbi një pjesë të pronës së kërkuesit ishte proporcionale dhe nuk e ka privuar pronarin nga mjetet e përditshme financiare. Sa i takon pretendimeve për zgjatjen e sekuestros në kohë, GJEDNJ çmon se kërkuesi nuk ka shfrytëzuar mjetet e brendshme efektive të ankimit për t`a kundërshtuar atë. GJEDNJ vlerëson se kërkuesit kanë pasur mjete të brendshme efektive ankimi për t`i shfrytëzuar sipas legjislacionit vendas, por nuk i kanë shteruar ato dhe për pasojë kërkesat e tyre janë të papranueshme. https://hudoc.echr.coe.int/?i=001-238161
2. Mospranim i pretendimit për cenimin e gjykimit të drejtë dhe për jetë private e familjare, për shkak të shkarkimit të magjistratit nga detyra me “procesin e vettingut”. (Fjalë kyçe: gjykim i drejtë, jetë private dhe familjare, vetting, magjistrat, deklaratë pasurie, aset i padeklaruar)
Në çështjen“Dedja kundër Shqipërisë”, kërkesa nr. 32489/19, vendimi i datës 15 tetor 2024, për cenimin e parimit të gjykimit të drejtë dhe të drejtës për jetë private dhe familjare, si pasojë e shkarkimit të magjistratit nga detyra me “procesin e vettingut”, GJEDNJ vlerëson se kërkesa është e pabazuar, pasi shkarkimi i kërkuesit nga detyra ka qenë i ligjshëm. Deklarimi i pasaktë i pasurive nga ana e magjistratit apo mosdeklarimi i një aseti/aktivi prej tij, ndërkohë që ka vite që jeton e banon në të pa pagesë, konsiderohet shkelje e rëndësishme e legjislacionit të brendshëm, që justifikon shkarkimin e tij. Për sa kohë që në tërësi ndaj kërkuesit është zhvilluar një proces i drejtë, pretendimet e tij për shkeljen e nenit 6 të KEDNJ janë të pabazuara. https://hudoc.echr.coe.int/?i=001-238160
3. Mospranim i pretendimit për cenimin e gjykimit të drejtë, për shkak të shkarkimit të magjistratit nga detyra me “procesin e vettingut”. (Fjalë kyçe: gjykim i drejtë, vetting, magjistrat, deklaratë pasurie, deklarim i pasaktë, hua e padeklaruar)
Në çështjen“Hoxha kundër Shqipërisë”, kërkesa nr. 16701/19, vendimi i datës 15 tetor 2024, për cenimin e parimit të gjykimit të drejtë, si pasojë e shkarkimit të magjistratit nga detyra me “procesin e vettingut”, GJEDNJ vlerëson se kërkesa është pabazuar, pasi shkarkimi i kërkuesit nga detyra ka qenë i ligjshëm. Mosdeklarimi i huave të marra prej magjistratit nga të afërmit e tij, ndërkohë që të afërmit nuk provojnë burimin e ligjshëm të të ardhurave dhe nuk kanë paguar taksat e tatimet për to, përbën deklaratë të pasaktë e të pamjaftueshme pasurie prej tij, me pasojë shkarkimin nga detyra. GJEDNJ vëren se në tërësi është zhvilluar një proces i drejtë gjyqësor ndaj kërkuesit, për sa kohë që provat e depozituara prej tij, e të papranuara nga Kolegji i Posaçëm i Apelimit, nuk kanë pasur vlerë domethënëse për të zhbërë rezultatin e procesit. https://hudoc.echr.coe.int/?i=001-238159
4. Mospranim i pretendimit për ekzekutimin e një vendimi gjyqësor brenda afatit të arsyeshëm dhe për cenimin e të drejtës së pronës. (Fjalë kyçe: vendim gjyqësor, vërtetim fakti, afat i arsyeshëm, e drejtë prone)
Në çështjen“Papa kundër Shqipërisë”, kërkesa nr. 9096/11, vendimi i datës 17 tetor 2024, për moszbatimin e vendimit gjyqësor brenda afatit të arsyeshëm dhe shkeljen e të drejtës së pronës, GJEDNJ vlerëson se kërkesa është pabazuar, pasi vendimi i gjykatës së shkallës së parë që kërkon të ekzekutojë kërkuesja është prishur nga gjykatat më të larta dhe nuk është më në fuqi. https://hudoc.echr.coe.int/?i=001-238158
5. Shkelje e të drejtës për ekzekutimin e vendimit gjyqësor të formës së prerë brenda afatit të arsyeshëm dhe e të drejtës së pronës. (Fjalë kyçe: vendim gjyqësor i formës së prerë, afat i arsyeshëm, e drejtë prone, mosveprim i përmbaruesit)
Në çështjen “Shehu kundër Shqipërisë”, kërkesa nr. 62977/09, vendimi i datës 12 nëntor 2024, për moszbatimin e vendimit gjyqësor brenda afatit të arsyeshëm dhe cenimin e të drejtës së pronës, GJEDNJ vlerëson se kërkesa është e bazuar, pasi vendimi gjyqësor i formës së prerë nuk është ekzekutuar që prej vitit 1999, ç`ka vërehet edhe nga përmbajtja e vendimit të dhënë nga Gjykata Kushtetuese, ku citohet se përmbaruesi nuk ka marrë masat e nevojshme për t`a zbatuar vendimin gjyqësor. Edhe pse kërkuesi është dënuar më pas për falsifikim dokumentacioni dhe çështja penale mund të sjellë efekte edhe në drejtim të vendimit civil që ai kërkon të ekzekutojë, për sa kohë që ky i fundit nuk është rishikuar ende nga gjykata, ndodhemi përpara një vendimi të paekzekutuar brenda afatit të arsyeshëm me pasojë cenimin e të drejtës së pronës. https://hudoc.echr.coe.int/?i=001-237943
6. Shkelje e të drejtës për ekzekutimin e vendimit gjyqësor të formës së prerë brenda afatit të arsyeshëm dhe e të drejtës së pronës. (Fjalë kyçe: vendim gjyqësor i formës së prerë, afat i arsyeshëm, e drejtë prone, mos/regjistrim i pronës, shpronësim faktik, titull pronësie, jo/proporcionalitet, legalizim i ndërtimit pa leje, mjete efektive të ankimit, kompensim financiar)
Në çështjen“Ramaj kundër Shqipërisë”, kërkesa nr. 17758/06, vendimi i datës 10 dhjetor 2024, për moszbatimin e vendimit gjyqësor brenda afatit të arsyeshëm dhe cenimin e të drejtës së pronës, GJEDNJ vlerëson se kërkesa është bazuar, pasi refuzimi i padrejtë i autoriteteve shtetërore për të regjistruar në kadastër titullin e pronësisë për një periudhë 26 vjeçare, përbën një ndërhyrje joproporcionale në të drejtat e pronësisë, për sa kohë që këto autoritete kanë regjistruar tituj të tjerë konkurrues pronësie të personave të tretë. Kjo lloj vonese prej 26 vitesh për regjistrimin e pronës, përbën gjithashtu pasivitet të pajustifikuar të organeve shtetërore, me pasojë shkeljen e të drejtës për ekzekutimin e vendimit gjyqësor të formës së prerë brenda afatit të arsyeshëm. Sa i takon zënies së disa pjesëve të pronës së kërkuesit me ndërtime të paligjshme, të legalizuara tashmë nga të tretë, ndodhemi përpara një “shpronësimi faktik” të pronës. Pavarësisht “shpronësimit faktik”, nuk rezulton që kërkuesi të ketë shfrytëzuar mjetet e brendshme ligjore, me qëllim që t`i kundërshtonte ndërtimet pa leje në tokën e tij, e nisur nga përmbajtja e ligjit nr. 20/2020, ai tashmë nuk mund të pretendojë regjistrimin e pronës për këto pjesë, por vetëm kompensimin financiar. Për sa kohë që nuk provohet të jetë kërkuar kompensimi financiar nga kërkuesi, pretendimet e tij për cenimin e të drejtës së pronës, për pjesët e “shpronësuara faktikisht”, përmes procedurave të legalizimit, mbeten të pabazuara. https://hudoc.echr.coe.int/?i=001-238315
7. Shkelje e të drejtës për ekzekutimin e vendimit gjyqësor të formës së prerë brenda afatit të arsyeshëm. (Fjalë kyçe: vendim gjyqësor i formës së prerë, afat i arsyeshëm)
Në çështjen “Maho kundër Shqipërisë”, kërkesa nr. 24908/18, vendimi i datës 12 dhjetor 2024, për moszbatimin e vendimit gjyqësor brenda afatit të arsyeshëm, GJEDNJ vlerëson se kërkesa është e bazuar, pasi autoritetet shtetërore nuk kanë marrë masat e nevojshme për të vënë në zbatim vendimin e formës së prerë që prej vitit 2007, gjë e cila është konstatuar edhe nga Gjykata Kushtetuese me vendimin e dhënë në vitin 2017. https://hudoc.echr.coe.int/?i=001-238379
3. Pasqyrimi i aktiviteteve të Gjykatës së Lartë
Në datën 7 nëntor 2024, me ftesë të kryetarit Sokol Sadushi, Gjykata e Lartë u vizitua nga kryetarja e Gjykatës së Lartë të Kasacionit të Italisë znj. Margherita Cassano, e cila u shoqërua në vizitë nga Sekretari i Përgjithshëm z. Stefano Mogini. Në takim u vlerësuan marrëdhëniet shumë të mira mes dy popujve, si dhe u diskutua mbi sfidat që po përballen sistemet gjyqësore të dy vendeve. https://www.gjykataelarte.gov.al/sq/lajme/media/kryetarja-e-gjykates-se-larte-te-kasacionit-te-italise-zj.-margherita-cassano-ndodhet-ne-tirane-me-ftese-te-kryetarit-te-gjykates-se-larte-z.-sokol-sadushi.
Në datën 14 nëntor 2024, ambasadori britanik në Tiranë Nicholas Abbott takon kryetarin e Gjykatës së Lartë z. Sokol Sadushi. Kryetari uroi ambasadorin Abbott për marrjen e detyrës në Tiranë dhe i shprehu mirënjohjen për ndihmën që Britania e Madhe siguron vazhdimisht për sistemin e drejtësisë në Shqipëri. https://www.gjykataelarte.gov.al/sq/lajme/media/ambasadori-britanik-ne-tirane-nicholas-abbott-takon-kryetarin-e-gjykates-se-larte-z.-sokol-sadushi.
Në datën 16 nëntor 2024 u nda nga jeta anëtari i Gjykatës së Lartë, z. Darjel Sina. Darjel Sina u emërua në këtë detyrë në prill të vitit 2022, nga radhët e juristëve me përvojë në fushën e së drejtës.
E ngarkuara me punë e ambasadës së Shteteve të Bashkuara të Amerikës në Shqipëri, znj. Nancy VanHorn, zhvilloi një vizitë zyrtare pranë Gjykatës së Lartë. Znj. VanHorn u prit nga kryetari i Gjykatës së Lartë Sokol Sadushi dhe theksoi se SHBA do të vazhdojë të ndihmojë gjyqësorin, në funksion të përparimit të shtetit të së drejtës në Shqipëri. https://www.gjykataelarte.gov.al/sq/lajme/media/e-ngarkuara-me-pune-nancy-vanhorn-vizite-zyrtare-ne-gjykaten-e-larte.
Në datën 29 nëntor 2024, kryetari i Gjykatës së Lartë Sokol Sadushi mori pjesë në seminarin e ACA-Europe, të organizuar nga Këshilli Francez i Shtetit me temë “Etika dhe rekrutimi i anëtarëve të gjykatave, këshillave të shtetit dhe gjykatave të larta administrative”. Seminari trajtoi çështje të kuadrit ligjor dhe institucional mbi etikën, integritetin, parandalimin e konfliktit të interesave në kuadër të rekrutimit dhe emërimit të gjyqtarëve.
4. Statistika
Vendime të dhëna nga Gjykata e Lartë për muajin tetor 2024:
Kolegji Administrativ ka dhënë 292 vendime, nga të cilat 261 janë vendime themeli, 4 kompetencë/juridiksion, si dhe 27 pezullim ekzekutimi/revokim pezullimi/kërkesa të ndryshme.
Kolegji Civil ka dhënë 314 vendime, nga të cilat 299 janë vendime themeli, 10 kompetencë/juridiksion, si dhe 5 pezullim ekzekutimi/revokim pezullimi/kërkesa të ndryshme.
Kolegji Penal ka dhënë 177 vendime, nga të cilat 168 janë vendime themeli, 5 kompetencë/juridiksion, si dhe 4 pezullim ekzekutimi/revokim pezullimi/kërkesa të ndryshme.
Në total për muajin tetor 2024 janë dhënë 783 vendime gjyqësore.
5. Formati i rekursit në Gjykatën e Lartë
Gjykata e Lartë këshillon përdorimin e formatit të miratuar të rekursit, që gjendet në linkun: https://gjykata-media.s3.eu-central-1.amazonaws.com/format_rekursi_5207_1_3d
6. Informacion mbi gjykimin e çështjeve gjyqësore
Gjykata e Lartë këshillon aksesimin e rubrikës njoftime për publikun, për t`u njohur me vendimmarrjet e përditshme të trupave gjyqësore të çdo Kolegji të Gjykatës së Lartë në linkun: https://www.gjykataelarte.gov.al/sq/lajme/publiku
7. Vizitat në Gjykatën e Lartë (Gjykata e Hapur/Open court)
Gjykata e Lartë mundëson pjesëmarrjen e çdo të interesuari (qytetar, studiues, praktikant i së drejtës, student apo nxënës shkolle) në seanca gjyqësore apo që dëshiron të vizitojë institucionin, duke afruar veprimtarinë e saj të përditshme me publikun. Ky akses mundësohet përmes aplikimit të thjeshtë elektronik, duke plotësuar modulet (emër, mbiemër, email dhe përmbajtjen e mesazhit/arsyet e vizitës). Aplikoni duke vizituar linkun: https://www.gjykataelarte.gov.al/sq/akrediti
Kontakto:
Tel.: +355 4 2257304;
Fax: +355 (4) 228837;
Email: info@gjykataelarte.gov.al;
Adresa postare: Rruga: "Ibrahim Rugova", nr. 20, 1001, Tiranë, Shqipëri.