Gjykata e LartëMISIONI: Të bashkërendojë, organizojë dhe ndajë punën e drejtorisë së administrimit gjyqësor gjyqësor nën drejtimin e kancelarit të gjykatës, duke kryer veprimtari/aktivitete që synojnë organizimin dhe garantimin e funksionimit të duhur të shërbimeve të gjyqësore të gjykatës.
QËLLIMI I PËRGJITHSHËM I POZICIONIT TË PUNËS: Kryesekretari/drejtori në ushtrimin e detyrave të tij/saj ka si qëllim të kryejë veprimet e nevojshme procedurale që lidhen me vendimmarrjen gjyqësore të Gjykatës së Lartë.
DETYRAT KRYESORE: Kryesekretari/Drejtori ushtron në veçanti këto kompetenca: Nënshkruan të gjitha aktet procedurale që kërkojnë njoftime procedurale sipas parashikimeve ligjore; Është përgjegjës për mbajtjen e regjistrave manual dhe elektronik të Gjykatës; Mban procesverbalin e organizimit të hedhjen se shortit gjyqësor në mënyre manuale në rastet kur: (i) Bëhet zëvendësimi i gjyqtarit, që ka pengesë ligjore për gjykimin e çështjes, me një gjyqtar tjetër; (ii) Shyrtohen kërkesat për pezullimin e ekzekutimit të vendimit civil apo administrativ; (iii) Kolegjet e Bashkuara shqyrtojnë çështje të cilat janë në kompetencë të tyre; (iv) Shqyrtohen kërkesat për përjashtimin nga gjykimi i çështjes i një gjyqtari te Gjykatës së Lartë; Kryesekretari u jep informacion palëve të interesuara në lidhje me zhvillimin e seancave, trajton kërkesat e paraqitura nga palët për shtyrjen e seancave, pushimin e gjykimit, si dhe çdo kërkesë tjetër që lidhet me shqyrtimin e çështjes, dhe ia kalon këto kërkesa gjyqtarit relator; Mbikëqyr procesin e verifikimit të dosjen pas përfundimit të gjykimit dhe të inventarizimit e plotë të saj, duke përfshirë numërtimin e faqeve; Është anëtar i Komisionit për Asgjësimin e Mjeteve Materiale; Ndjek dhe kujdeset për zbatimin e vendimeve, urdhrave dhe udhëzimeve të Kryetarit dhe Kancelarit të gjykatës që kanë të bëjnë me veprimtarinë gjyqësore ose administrative të gjykatës, si dhe realizon çdo detyrë sipas parashikimit të Rregullores së Brendshme të Gjykatës; Mban kontakte të vazhdueshme me gjykatat e shkallëve më të ulta në lidhje me aspekte që kanë të bëjnë me veprimtarinë gjyqësore..
MISIONI: Drejtori i Marrëdhënieve me Publikun dhe me Jashtë kujdeset për informimin e publikut dhe medias, brenda dhe jashtë vendit, në lidhje me veprimtarinë e gjykatës në përputhje me rregullat e miratuara nga Këshilli i Lartë Gjyqësor. Transparenca dhe publiciteti mbi veprimtarinë e Gjykatës së Lartë duhet të jetë në fokus të veprimtarisë së kësaj drejtorie dhe të drejtuesit të saj. Ky mision duhet të kryhet duke u bazuar në krijimin dhe ruajtjen e marrëdhënieve profesionale dhe etike me publikun, si dhe kujdeset për komunikimin e përditshëm me të gjithë përdoruesit e gjykatës në përputhje me legjislacionin për të drejtën e informimit. Shërbimet e marrëdhënieve me publikun kryhen duke respektuar parimin për të drejtën e informimit, mbrojtjen e dinjitetit njerëzor, privatësinë dhe të dhënave personale, reputacionin dhe prezumimin e pafajësisë. Gjithashtu, në mbajtjen e marrëdhënieve me gjykatat homologe ose anëtarësinë në organizata ndërkombëtare ruhet në çdo rast reciprociteti dhe respekti ndaj partnerëve dhe politikave kombëtare dhe institucionale sipas rastit.
QËLLIMI I PËRGJITHSHËM I POZICIONIT TË PUNËS: Shërbimet e Drejtorisë në përgjithësi dhe të Drejtorit në vecanti synojnë të garantojnë zbatimin e të drejtës së informimit mbi veprimtarinë e gjykatës në funksion të transparencës që Gjykata duhet të tregojë, duke garantuar në të njëjtën kohë edhe të drejtën për ruajtjen e të dhënave personale. Drejtori i kësaj njësie mban parasysh prezantimin me dinjitet dhe korrektësi të të gjithë veprimtarisë së Gjykatës, brenda dhe jashtë vendit duke u bazuar në parimet e parashikuara në Ligjin për Pushtetin Gjyqësor dhe legjislacionin për mbrojtjen e të dhënave personale dhe të drejtën e informimit, si dhe orientimet dhe udhëzimet e gjyqtarit të medias dhe Këshillit të Lartë Gjyqësor për publicitetin dhe informimin sipas rastit. Gjithashtu, drejtori bën përpjekje të vazhdueshme që të bëjë sa më të njohur Gjykatën në raport me gjykatat dhe institucionet relevante ndërkombëtare.
DETYRAT KRYESORE: Drejtori i Drejtorisë së Marrëdhënieve me Publikun dhe me Jashtë ushtron këto kompetenca: Përgjigjet për caktimin e pikës së kontaktit për të informuar publikun sipas orarit të miratuar nga Këshilli i Gjykatës, sqaron të interesuarit (përfituesit e gjykatës) dhe, sipas rastit, bashkëpunon me njësinë përkatëse kompetente të Gjykatës për zgjidhjen e çështjes ose përgatitjen e përgjigjes; Vepron si koordinator në përputhje me ligjin për kompetencat e koordinatorit për të drejtën e informimit; Kujdeset për hartimin në kohë dhe me cilësi të përgjigjeve me shkrim ndaj kërkesave, ankesave dhe deklarimeve të shtetasve, pas konsultimit me nëpunësin civil gjyqësor përgjegjsë në Gjykatë; Kujdeset për mbajtjen dhe ruajtjen e regjistër të veçantë ku shënohen të gjitha veprimtaritë e ndërmarra: data, subjekti që ankohet, shkurtimi i kërkesës ose ankesës dhe mënyra e veprimit nga Sektori; Përgatit dokumente strategjikë dhe/ose politikë të gjykatës në lidhje me mënyrën e zhvillimit të mëtejshëm dhe përmirësimin e vazhdueshëm të marrëdhënieve dhe komunikimit me publikun për të siguruar njëtrajtshmëri dhe mosdiskriminim në trajtimin e të interesuarve (përfituesve) si dhe në përputhje me legjislacionin për të drejtën e informimit; Gjithashtu, me propozimin e përgjegjësit të sektorit të marrëdhënieve me jashtë harton, planifikon dhe kujdeset për realizimin e bashkëpunimeve të Gjykatës me gjykata të huaja partnere ose në organizata rajonale, europiane dhe ndërkombëtare, sipas rastit; Kujdeset që publikut t’i sigurohet informacion faktik rreth vendimeve gjyqësore dhe për korrigjimin e gabimeve të mundshme mbi faktet për çështje të caktuara; Përgatit çdo dokument tjetër që i kërkohet nga Kancelari, gjyqtari i medias.
MISIONI: Njësia e burimeve njerëzore përgjigjet për hartimin e dokumenteve të nevojshme për administrimin e regjistrit të stafit të Gjykatës, procesin e rekrutimit të punonjësve të tjerë të gjykatës, si dhe ndihmon në vlerësimin profesional të nëpunësve civilë gjyqësorë si dhe ndjek për çdo aspekt tjetër që ka të bëjë me statusin e nëpunësit civil gjyqësor.
Nësia e Shërbimeve Finaciare ushtron dhe zbaton detyrimet që rrjedhin nga Ligji “Për menaxhimin e sistemit buxhetor në Republikën e Shqipërisë” dhe Ligjin “Për menaxhimin e kontrollit financiar” si dhe aktet në zbatim të tyre.
QËLLIMI I PËRGJITHSHËM: Shërbimet e burimeve njerëzore synojnë të garantojnë shërbim civil gjyqësor në Gjykatë të qëndrueshëm, profesional, të bazuar në meritë, integritet moral dhe paanësi politike. Specialisti i burimeve njerëzore në ushtrimin e detyrave të tij/saj udhëhiqet nga parimet e parashikuara në Ligjin për Pushtetin Gjyqësor, Ligjin për Nëpunësin Civil, Kodin e Punës dhe Kodin e Procedurës Administrative.
Shërbimet e financës synojnë të garantojnë dhe sigurojnë që nëpërmjet një planifikimi buxhetor dhe financiar të saktë dhe kontrolli shpenzimesh të vazhdueshëm, të mos cenohet funksionimi dhe mbarëvajtja e punës në Gjykatë. Specialisti i financës në ushtrimin e detyrave të tij/saj udhëhiqet nga parimet e parashikuara në Ligjin për Pushtetin Gjyqësor dhe legjislacionin buxhetor dhe financiar përkatës.
DETYRAT KRYESORE: Ndihmon Kancelarin në krijimin dhe administrimin e Regjistrit të Personelit të Gjykatës si dhe të dosjes personale për të gjithë gjyqtarët, nëpunësit civilë gjyqësorë dhe të punonjësve të tjerë të gjykatës sipas ligjit; b) Harton dokumente dhe programe që lidhen me personelin, si pajisja dhe plotësimi me libreza pune, përpilimi i kontratave individuale të punës dhe nënshkrimi i tyre nga punëdhënësi e punëmarrësi, përpilimi i grafikut të lejeve vjetore për personelin administrativ; c) Ndihmon Këshillin e Gjykatës në kryerjen e detyrave që lidhen me hartimin e përshkrimeve të punës, si dhe çështje të tjera që lidhen me statusin e nëpunësve civilë gjyqësorë sipas ligjit; d) Ndihmon Kryetarin në procesin e vlerësimit periodik profesional sipas ligjit duke përgatitur projektvendimet për vlerësim si dhe të gjitha dokumentet e tjera të nevojshme për kryerjen e vlerësimit profesional; e) Ndihmon Kryetarin në procesin e rekrutimit të punonjësve të tjerë të Gjykatës sipas ligjit duke përgatitur të gjitha dokumentet dhe aktet e nevojshme për këtë qëllim; f) Merr masa për t’i plotësuar personelit të Gjykatës së Lartë materialet e nevojshme kancelarike dhe çdo pajisje tjetër, kujdeset për plotësimin e kërkesave për karburant e pjesë këmbimi të automjeteve të institucionit dhe siguron gatishmërinë e mjeteve, kujdeset për kryerjen e punimeve dhe shërbimeve për mirëmbajtjen e ndërtesës dhe të zyrave, për sigurimin me energji elektrike dhe lidhje telefonike, si dhe për krijimin e lehtësirave të nevojshme për veprimtarinë e Gjykatës së Lartë; g) Merr masa për riparimin dhe shërbimet e nevojshme për mirëmbajtjen e automjeteve, të pajisjeve dhe aparaturave, dhe kur konstatohet se dëmtimet e tyre kryhen me faj, nxjerr përgjegjësinë personale dhe parashtron propozimet për zhdëmtim; gj) Kontrollon përdorimin me korrektësi të mjeteve, pajisjeve dhe automjeteve, si dhe ndalon çdo keqpërdorim e shfrytëzim abuziv të tyre; h) Kryen detyra të tjera, sipas urdhrave apo porosive të Kryetarit, Kancelarit apo Këshillit të Gjykatës.
Harton projekt-programin buxhetor afatmesëm dhe vjetor të institucionit duke përcaktuar nevojat për fonde, sipas programeve, produkteve dhe aktiviteteve përbërëse të tyre, duke bashkërenduar punën me sektorët e tjerë të institucionit; i paraqet për miratim në organet përkatëse (Këshillin e Gjykatës, Këshillin e Lartë Gjyqësor), brenda afateve te caktuara; b) Ndjek në vijimësi zbatimin e buxhetit të institucionit, evidenton dhe kontrollon shpenzimet buxhetore sipas zërave. Nxjerr të dhënat mujore, 6-mujore dhe vjetore, mbi bazën e dokumenteve financiare të shpenzimeve dhe të ardhurave, analizon periodikisht shpenzimet e bëra sipas zërave të buxhetit; c) Përgatit, analizon e raporton monitorimin e realizimeve financiare të institucionit me objektivat e arritura dhe informon, për ecurinë e tyre, Këshillin e Gjykatës; d) Zbaton rregullat e menaxhimit financiar, mban llogaritë e institucionit, përgatit pasqyrat financiare dhe harton bilancin ekonomiko-financiar në përputhje me planin kontabël e ligjin për kontabilitetin; e) Kontabilizon veprimet e bankës, arkës, magazinës, ditarin e veprimeve të ndryshme dhe thesarit. Kryen çdo muaj mbylljen e llogarive dhe rakordon të dhënat me degën e thesarit dhe Këshillin për përdorimin e buxhetit; f) Organizon kontrolle, verifikime dhe inventarizime periodike për administrimin e vlerave materiale dhe monetare në përdorim, për të gjitha llojet e shpenzimeve të kryera nëpërmjet arkës, bankës dhe magazinës; g) Harton, kontrollon dhe zbaton shpenzimet buxhetore për personelin dhe ndalesat përkatëse për tatim-taksat, sigurimet shoqërore e shëndetësore dhe sigurimin suplementar, etj.
MISIONI: Drejtori i shërbimit të teknologjisë së informacionit siguron mirëmbajtjen dhe administrimin e sistemin hardware dhe software të Gjykatës. Kjo përfshin sistemin e çdo të dhëne që mban Gjykata, jo vetëm në lidhje me vendimmarrjen e saj por edhe me sigurinë dhe ruajtjen fizike të godinës dhe të punonjësve të saj.
QËLLIMI I POZICIONIT TË PUNËS: Drejtori i Shërbimit të Teknologjisë së Informacionit dhe Sigurisë synon të garantojnë mirëfunksionimin e plotë dhe pa pengesa të sistemeve të teknologjisë së informacionit (hardware, software) të Gjykatës si një mjete të domosdoshme dhe të pazëvendësueshme për mbarëvajtjen e punës. Gjithashtu, ai përgjigjet edhe për sigurinë e godinës, gjyqtarëve dhe punonjësve të tjerë të Gjykatës gjatë kohës që ata gjenden fizikisht brenda saj.
DETYRA KRYESORE: Drejtori i Drejtorisë së Teknologjisë së Informacionit dhe Sigurisë ushtron në veçanti këto kompetenca: Mirëmban sistemin ekzistues të kompjuterave dhe aparaturave të tjera elektronike, duke përfshirë hardware dhe software; Propozon ide dhe strategji lidhur me mjetet dhe teknologjinë e avancuar të informacionit dhe sigurisë në Gjykatë; Bashkëpunon dhe mban lidhje me sektorët e tjerë për përditësimin e të dhënave të sistemit dhe përmirësimin e teknologjisë në Gjykatë, pasi konsultohet me drejtorinë përkatëse në KLGJ; Monitoron, administron dhe mirëmban infrastrukturën kompjuterike dhe informatike në Gjykatën e Lartë me anë të operacioneve periodike për të garantuar funksionimin e tyre normal, përfshirë këtu (por duke mos u kufizuar me to) testimin e pajisjeve, monitorimin, përditësimin, dhe kryerjen e kopjeve rezervë dhe raporteve, etj.; Ofron mbështetje pa vonesë në raste kërkesash për problemet kompjuterike nga stafi i Gjykatës; Mirëmban dhe mbështet infrastrukturën informative të Gjykatës së Lartë: rrjetin e brendshëm kompjuterik (LAN/WAN) dhe siguron komunikimin e të dhënave; Instalon, mirëmban dhe mbështet aplikacione të ndryshme software në Gjykatë; Përgjigjet për përditësimin e informacioneve në faqen zyrtare të Gjykatës, pas përgatitjes së përmbajtjes së tyre nga drejtoritë përkatëse; Harton dhe zbaton politikën e sigurisë informative të Gjykatës duke instaluar, konfiguruar, dhe mirëmbajtur sisteme kundër programeve dashakeqëse, ndërhyrëse (mure mbrojtës, antiviruse, etj.; Ofron udhëzime dhe trajnime për stafin e Gjykatës, sipas nevojës, për përdorimin e programeve që përdoren në Gjykatë; Analizon kërkesat e reja të teknologjisë dhe përpilon analiza konkurruese; Harton dhe monitoron respektimin e standardeve të teknologjisë së informacionit që janë tepër të rëndësishme për integritetin, sigurinë dhe performancën e infrastrukturës teknike të Gjykatës; Mbikëqyr zbatimin dhe performancën e të gjitha nismave që Gjykata ndërmerr në lidhje me teknologjinë; Përgatit në bashkëpunim me Drejtorinë e Administrimit Gjyqësor statistika për qëllime raportimi periodik pranë Këshillit të Lartë Gjyqësor, apo institucione të tjera sipas rastit ose për përdorim të brendshëm të matjes së elementëvë të ndryshëm të administrimit gjyqësor dhe të performancës së Gjykatës dhe nëpunësve civil gjyqësore të saj në tërësi; Përgjigjet së bashku me përgjegjësin e sektorit të sigurisë për funksionimin dhe mirëmbajtjen e sistemit konvencional dhe/ose elektronik/digjital të sigurisë së Gjykatës, si dhe të çdo lloj problemi që lidhet me të; Përgjigjet së bashku me përgjegjësin e sektorit të sigurisë për masat e sigurisë gjatë zhvillimit të seancave gjyqësore me pjesëmarrje të palëve, që nga momenti i ardhjes së tyre deri në përfundimin e seancës dhe shoqërimin e tyre jashtë mjedisit të Gjykatës; Merr masa dhe jep udhëzime për sigurinë fizike të gjyqtarëve dhe punonjësve të tjerë të Gjykatës gjatë kohës që ato janë brenda mjedisve të Gjykatës, duke urdhëruar shoqërimin nga specialisti i sigurisë të cdo personi të jashtëm në zyrat e Gjykatës, gjatë gjithë kohës që janë në mjediset e saj; Merr masa kur është e nevojshme të asistojnë punonjësit e Drejtorisë së Administrimit Gjyqësor si dhe të Drejtorisë së Marrëdhënieve me Publikun dhe me Jashtë kur i shërbejnë drejtpërdrejt publikut.
MISIONI: Qendra e Dokumentacionit është një strukturë ndihmëse që mbështet gjyqtarët dhe Njësinë e Shërbimit Ligjor. Ajo është përgjegjëse kryesisht për: sigurimin e publikimit të menjëhershëm të vendimeve të Gjykatës së Lartë sipas formave dhe mënyrave të përcaktuara dhe përgatitjen e analizave të ndryshme të praktikës gjyqësore të Gjykatës së Lartë, gjykatave të tjera kombëtare dhe gjykatave ndërkombëtare.
QËLLIMI I PËRGJITHSHËM I POZICIONIT TË PUNËS: Shërbimet e specialistit të dokumentimit synojnë të sigurojnë analizë të thellë dhe gjithëpërfshirëse të aspekteve të ndryshme të së drejtës (duke përfshirë praktikën gjyqësore vendase, të huaj, literaturën vendase dhe të huaj etj.) për të siguruar vendimmarrje të Gjykatës bazuar në rezultate të mbështetura në kërkim ligjor që reflekton standardet më të larta profesionale. Nëpunësii dokumentimit në ushtrimin e detyrave të tij/saj udhëhiqet nga parimet e parashikuara në ligjet procedurale dhe në Ligjin për Pushtetin Gjyqësor.
DETYRAT KRYESORE: Specialisti pranë Qendrës së Dokumentacionit ushtron në veçanti këto detyra:Studion praktikën gjyqësore të Gjykatës dhe paraqet mendime lidhur me qëndrimin dhe linjën e ndjekur nga Gjykata, për çështje të caktuara juridike gjatë procesit vendimmarrës së saj; Kryen punë kërkimore në literaturë dhe doktrinë juridike, si dhe jurisprudencë në gjuhë të huaj në ndihmëtë Kolegjeve të Gjykatës për çështje që kanë të bëjnë me njëhsimin e praktikës gjyqësore dhe të Kolegjeve të Bashkuara për çështjet që kanë të bëjnë me ndryshimin e praktikës gjyqësore; Përgatit, në mënyrë periodike, përmbledhje të shkurtra të vendimeve të Gjykatës së Strasburgut dhe Luksemburgut, me qëllim përditësimin e Gjykatës së Lartë me praktikën me të fundit të këtyre gjykatave; Përgatit materiale ndihmëse që i nevojiten gjyqtarëve të Gjykatës për pjesëmarrjen në aktivitete shkencore ose aktivitete të tjera brenda dhe jashtë vendit. Materialet përgatiten sipas rastit në bashkëpunim me sektorë të tjerë të Gjykatës; Bashkëpunon në zhvillimin e aktiviteteve me karakter shkencor që organizon gjykata dhe dokumenton gjithë materialet lidhur me to; Përgatit materiale të karakterit shkencor për çështje të ndryshme të së drejtës me porosi të Kryetarit, Zëvendëskryetarit ose Kryetarëve të Kolegjit; Përgatit, sa herë është e nevojshme, materiale të karakterit informativ mbi zhvillimet legjislative në fushën e të drejtës për gjyqtarët e Gjykatës; Siguron publikimin e vendimeve të Gjykatës në forma dhe mënyra të përcaktuara për këtë qëllim duke u kujdesur të paraqesë në mënyrë sintetike dhe të kuptueshme aspektet më thelbësorë të vendimit; Kujdeset për publikimin e plotë në faqen zyrtare të institucionit të të gjitha vendimeve të Gjykatës sipas rendit kronologjik, në përputhje me dispozitat për mbrojtjen e të dhënave personale; Kujdeset të krijojë një arkivë të vendimeve të Gjykatës sipas temave në një fushë të caktuar të së drejtës nëbashkë punim me strukturat përkatëse tëGjykatës; Përgatit statistika tematike të vendimmarrjes së Gjykatës, me qëllim orientimin sa më të shpejtë të gjyqtarëve dhe këshilltarëe ligjorë në praktikën gjyqësore të Gjykatës; Kryen çdo detyrëtjetër qëi caktohet nga Kryetari, Zëvendëskryetari ose Kancelari, në përputhje me natyrën dhe profilin e kësaj strukture.